Таразда теміржолды кесіп өтпек болған скутер жүргізушісі оқиға орнынан қашып кетті
ҚТЖ темір жолдағы қауіпсіздік ережелерін сақтауды еске салады, деп хабарлайды Rail-news.kz.
12 қараша күні сағат 16: 20-да Тараз станциясында дулыға киген және скутермен жүріп келе жатқан ер адам қозғалыстағы құрамның алдынан теміржолды кесіп өтуге тырысты. Пойыз құрастырушы ысқырықпен ескерту белгісін беріп, вагондарды тоқтатуға команда берді. Тәртіп бұзушы жақындап келе жатқан құрамды байқап, скутерді тастап, оқиға орнынан қашып кетті. Нәтижесінде скутерге соқтығу орын алды.
Вагондар мен жолдың жоғарғы құрылысының зақымдануы тіркелген жоқ, зардап шеккендер жоқ.
Ақпарат Тараз станциясының желілік полиция бөліміне берілді.
ҚТЖ скутерлер мен басқа да көлік құралдарының иелерін теміржол инфрақұрылымы аймағында болған кезде қауіпсіздік ережелерін қатаң сақтауға шақырады. Қозғалыстағы пойыздардың алдынан жолды кесіп өту әрекеттері адам өмірі мен қауіпсіздігіне қауіп төндіреді.