«Жыл машинисі» байқауы мәреге жетті
Қызылорда облысы бойынша меншікті тілші
Қызылордада еліміздің түкпір-түкпірінен үздік локомотив машинистері бас қосқан республикалық «Жыл машинисі» байқауы мәреге жетті. Жыл сайын дәстүрге айналған бұл байқаудың бастауы да дәл осы деподан тарайтынын еске салсақ, оның Сыр елінде өтуі – машинист кәсібіне құрмет пен сенімнің көрінісі.
Сайыс барысында қатысушылардың білім-білігі мен тәжірибесі алға шықты. Әрбір тапсырма кәсіби сын мен қатаң талап шеңберінде машинист жұмысын жанжақты көрсетіп, конкурсанттардың техникалық регламенттерді жетік білуі, заманауи локомотив жүйелерін басқару, қауіпсіздік нормаларын бұлжытпай орындауы, шұғыл жағдайларда дұрыс шешім қабылдауы жан-жақты сараланды. 30 үміткердің арасынан жүзден жүйрікті таңдау оңайға соққан жоқ.
Сайыс SevenBr оқу орталығында жоғары деңгейде ұйымдастырылып, қатысушыларға кәсіби шынайылыққа жақын орта қалыптастырылды. «ҚТЖ-ЖТ» ЖШС атқарушы директоры - локомотивтерді пайдалану департаменті директорының міндетін атқарушы Қуаныш Таутанов бастаған қазылар алқасы жинаған ұпай саны бойынша Семей өңірінің машинисі Ерлан Дюсенбин байқау жеңімпазы деп таныды. Ерланның сауалдарға қайтарған мінсіз жауабы мен теориялық дәлдігі, жоғары техникалық сауаттылығы, тапсырмаларды мүлтіксіз орындауы – бәрі-бәрі оның абсолютті жеңісіне бастайтын негізгі ерекшеліктері деді.
Екінші орынға Қазалы айналым депосының машинисі Сұлтанбек Әбілов ие болды. Сұлтанбек те жауапкершілігі мен ұқыптылығы, нақты есепке құрылған жұмыс тәсілімен ерекшеленіп, үздіктер қатарынан лайықты орын алды.
Үшінші орын Қарағанды депосының өкілі Алексей Панфиловқа бұйырды. Ол – тәжірибесі мол, техникалық көрсеткіштері жоғары маман ретінде қазылардың әділ бағасына ие болды.
Қызылорда ЖТ бөлімшесінің бас инженері Күлхан Белкібаев байқау жеңімпаздарын құттықтап, теміржол көлігі тасымалындағы ең жауапты тұлға машинист мәртебесін арттыруға ықпал ететін бұл байқау – тек сайыс емес, кәсіби шеберлікті дамыту, қауіпсіздік мәдениетін нығайту, ұрпақтар сабақтастығын сақтау жолындағы игілікті бастама екеніне тоқталды.
Байқау жеңімпаздары жеңіс тұғырына көтеріліп, арнайы жүлделермен марапатталды.