Үздік инноваторлар анықталды
«Қазақстан теміржолшысы» газетінің тілшісі
«Самұрық-Қазына» қоры және «Самғау» Ұлттық ғылыми-техникалық ақпарат орталығы портфельдік компаниялар арасында алғаш рет өткізген «Үздік инновациялық компания» байқауы жеңімпаздарын марапаттау рәсімі өтті.
Инновация мен ғылымды дәріптеу, жаңашыл идеяларды қолдау, тиімді тәжірибе алмасу, өндірістегі жұмысты жетілдіру және жаңа шешімдер ұсынудағы белсенділікті ынталандыру мақсатында өткен байқауда компаниялардың дамуына ықпал ететін үздік ұсыныстар мен жаңашыл бастамалар атап өтілді.
Салтанатты жиынға ҚР Премьер-министрінің орынбасары-Мәдениет және ақпарат министрі Аида Балаева, Парламент Мәжілісінің депутаты Еділ Жаңбыршин, Президент әкімшілігі мен мемлекеттік органдардың өкілдері, аталған қорға қатысты компаниялардың басшылары мен қызметкерлері қатысты.
Байқау 4 номинациядан тұрды. Бірінші – «Үздік инновациялық компания», мұнда компанияның инновацияларды қолдау деңгейі бағаланды: қызметкерлердің қатысуы, бөлінетін қаржы көлемі, тәжірибеге енгізілген идеялар саны, патенттердің және жоғары оқу орындары мен ғылыми-зерттеу институттарымен бірлескен жобалардың болуы бағаланды.
Екінші – «Үздік инноватор», қызметкердің жеке жетістіктері ескерілді: ұсынылған идеялардың саны мен сапасы, олардың жүзеге асу деңгейі және инновациялық мәдениетті дамытуға қосқан үлесі қаралды. Үшінші – «Ең үздік енгізілген ұтымды ұсыныс», ұсыныстың әлеуметтік және экономикалық тиімділігі бағаланды. Төртіншісі «Өндірістің инновациялық көшбасшысы» деп аталды. Байқауға қор тобына кіретін барлық портфельдік компаниялар қатысты. Арнайы құрылған комиссия келіп түскен 36 өтінімді бір ай бойы қараған.
Бүгін қорытындысы шығарылып, бірнеше номинация бойынша үздіктер анықталды. Солардың қатарында Бурабай курорты станциясында рельс дәнекерлеу кәсіпорнында жол машиналары мен механизмдерін жөндеуші болып еңбек ететін Александр Кунников «Үздік инноватор» аталымы бойынша 3-орын алып, арнайы төсбелгімен және 500 мың теңге ақшалай сыйлықпен марапатталды.
– Теміржол саласында 2015 жылдан бері жұмыс істеп келемін. 2021-2025 жылдар аралығында 5 рационализаторлық ұсыныс жасап, өндіріске енгіздім. Ол ұсыныстар рельс дәнекерлеу машиналары стационарлық құрылғыларының қызмет мерзімін ұзарту, басқару пульті операторының панелін жаңғырту және басқа да бағыттағы жобалар болды. Бала кезден өзім электроникамен айналысқанды ұнаттым. Сол қызығушылығым менің бүгінгі жетістіктеріме әкелді, – дейді теміржолшы А. Кунников.
Байқау жеңімпаздары марапатталып, дипломдар мен ақшалай сыйлықтарға ие болды. Үздік ұсыныстар мен жобалар ойлап тауып, өндіріске енгізетін таланттар еңбегіне алғыс айтылды. Ұйымдастырушылар байқау жалғасын табатынын жеткізді.