Жастар құрылтайы шымылдығын түрді

2025 жылдың 9 желтоқсаны күні «ҚТЖ» ҰК» АҚ ХІV Республикалық жастар форумы ашылды. Он төртінші рет өткізіліп отырған дәстүрлі форумның биылғы ерекшелігі – ол халықаралық сипат алып, Ресей, Армения, Қырғызстан және Моңғолия темір жолдарынан келген жастардың қатысуы еді.

«ҚТЖ» ҰК» АҚ топ-менеджерлерінің қатысуымен XIV Республикалық жастар форумының ресми ашылу салтанатында теміржолшы жастар өздерінің командалық жобаларын көпшілік назарына ұсынып, олардың компания жұмысына тигізетін пайдасы мен әсерін баяндады. Сөз кезегі шетелдік қонақтарға беріліп, олар Ресей, Моңғолия, Армения және Қырғызстан темір жолдарының жұмысы, атқарылып жатқан жобалар, жастар саясаты төңірегінде мағлұмат берді.  

Форумға арнайы шақырылған қонақтар қатарында ҚР Парламенті Мәжілісінің депутаты Геннадий Шиповских сөз алып, өзінің еңбек жолы қарапайым теміржолшы ретінде басталып, алғашқы жастар форумына қатысқанын әңгімеледі.  

– Мен машинист көмекшісі болып жұмыс істеп жүргенімде, алғаш рет І республикалық жастар форумы өтіп, соған қатыстым. Басында бұл форумның не пайдасы бар, не үшін керек деген ойдың болғанын да жасырмаймын. Бірақ кейін оның теміржолшы жастар үшін маңызы мен пайдасын түсіндім. Бұл форум жастардың өзін жан-жақты ашуына, кәсіби біліктілігін арттыруға, мансаптық қызметінде көтерілуіне, көшбасшылық қасиеттерді дамытуына үлкен мүмкіндіктер береді. Менің де мансаптық қызметте өсіп, бүгінгі дәрежеге жетуіме, саясатқа араласуыма осы форум алғышарт болды десем, асырып айтқаным емес. Өйткені жастар форумы теміржолдың жастарына бір орында тұрып қалмай, заман ағымына үн қосып, қазіргі уақыт талабынан қалыспай, білім-біліктерін көтеруге, әрекет етуге бағыт-бағдар беретін алаң. Сондықтан жастарға форум жұмысына белсене қатысыңыздар, компания жұмысына өз үлестеріңізді қосуға атсалысыңыздар дегім келеді. Қандай қызметте, қандай мансапта болсаңыз да, адамгершілік пен азаматтық келбеттеріңізді сақтап қалыңыздар, – деп ағалық ақыл-кеңесімен бөлісті Геннадий Шиповских.  

Бұдан кейін сөз алған «ҚТЖ» ҰК» АҚ Басқарма төрағасының орынбасары Марат Шакенов «ҚТЖ» ҰК» АҚ-да Жастар саясатына ерекше көңіл бөлініп отырғанын және компания жастардың тың идеяларын, тиімді бастамаларын, спорттық, әлеуметтік, қайырымдылық жобаларын қолдауға және іске асыруға мүдделі екенін атап өтіп, форум жұмысына сәттілік тіледі.  

Форум аясында бірінші күні қатысушыларға «ҚТЖ-100 жас есім», Жаңа буын көшбасшылығы, Жеке қабілетті дамыту оқытулары өтіп, кеш «Аймақтар визиткасы» бағдарламасына ұласты. 10 желтоқсан күні «ҚТЖ-100 жас есім» бағдарламасы бойынша оқыту жалғасын тауып, Кейстер чемпионаты, «Қалай фокус, энергия және тұрақтылықты сақтауға болады деген кәсіби мамандарға арналған стресс-менеджмент», «Өзгерістерді басқару: өзгерулер процесінде көшбасшылар мен агенттердің рөлі», «Жекебас тиімділігі, өсуге жол ашатын практикалық құралдар» сынды тренингтер өтіп, кешкілік бағдарлама «Табысты командалардың құпиясы» атты интерактивті симуляцияға жалғасты. Жастар форумының соңғы күні – 11 желтоқсан «Теміржол білгірлері» интеллектуалды ойынына ұласты. Түстен кейін Республикалық жастар форумының ресми жабылуы өтіп, Балалар тілегі шыршасы өтті. Ал кешкілік форум қатысушыларына арналған кешкі ас ұйымдастырылды.