Теміржолшылар жайлы жаңа телехикая көрсетілімде

Теміржол туралы тұңғыш рет түсірілген «Жолдар» телехикаясы 12 қаңтардан бастап «Хабар» арнасында көрсетіле бастайды. Қазақстандық теміржолшылар жайлы туындыда комедия мен драма элементтері тоғысқан, сонымен қатар достық, сезім, бәсекелестік және ұрпақтар сабақтастығы кеңінен көрініс табады.

Бұл сериал пойыздағы шынайы өмірді, жолсеріктердің күнделікті қызу тірлігін көрсетеді. Осы арқылы мыңдаған жолаушының жайлылығы үшін барын сала еңбек етіп жүрген жандарды терең тани түсеміз. Бұл өмірде бәріміз – жолға шыққан жолаушымыз, ал пойыздағы сапардың қызықтары таусылмас әңгімеге айналады.  

Басты кейіпкер – темір жолда көп жыл қызмет еткен тәжірибелі жолсерік. Ал жаңа қосылған жас та жігерлі әріптестер ескі тәртіпті өзгертуге тырысады. Тәжірибе мен жаңашылдық тартысқа түскен ұжым ортақ шешімдер іздеуге мәжбүр болады. Сериалда танымал актерлерден Алмат Сақатов, Еділ Анарбай, Гүлшат Такежанова ойнайды.

Тағы бір қызықты тұсы, өмірде теміржол саласында жұмыс істейтін жолсерік сериалда өз рөлін сомдайды. Оның нақты кім екенін білу үшін міндетті түрде сериалды көру керек. Түсірілім Алматыдағы темір жолда, теміржол станцияларында өтті, сондықтан әр кадрдан шынайылық сезіледі. Жолаушылар мен жолсеріктердің бастан кешкендері арқылы нағыз өмір көрсетіледі.  

15 бөлімдік қызықты әрі шуақты сериал ешкімді бейжай қалдырмайды. Премьераны 12 қаңтар күні кешкі сағат 22:00-де «Хабар» арнасынан көріңіздер!