Қазақстан Ауғанстан арқылы Араб теңізіне шығу жолдарын қарастырып жатыр
Қазақстан Пәкістан порттарына тікелей шығу мүмкіндігін беретін жаңа теміржол бағытын дамытуды қолға алды. Бұл туралы Көлік вице-министрі Жәнібек Тайжанов мәлімдеді, деп хабарлайды Rail-news.kz.
Еліміз қазіргі уақытта «Тұрғынды – Герат – Қандағар – Спин-Болдак» теміржол жобасын жүзеге асыру мәселесін пысықтап жатыр. Бұл транзиттік дәліз Ауғанстан аумағы арқылы өтіп, Араб теңізіндегі Пәкістан порттарына жол ашпақ. Вице-министрдің айтуынша, жобаны ілгерілету жұмыстары жоспарлы режимде жүріп жатыр.
Жобаны құқықтық тұрғыда бекіту үшін Қазақстан тарапы Біріккен Араб Әмірліктеріне үшжақты меморандум жобасын жолдаған. Құжатқа осы жылдың ақпан айында қол қойылады деп күтілуде. Сонымен қатар, Пәкістанның Теміржол министрлігімен арадағы жеке келісім де әзірлену үстінде.
Айта кетерлігі, Пәкістан билігі Қазақстан ұсынған бұл маршрутты толықтай қолдап отыр. Жаңа көлік дәлізі еліміздің экспорттық әлеуетін арттырып, Оңтүстік Азия нарығына шығуға жаңа мүмкіндіктер береді деп болжануда.