Шығыс тармаққа басымдық берілді

Жаңалықтар

20.10.2017, 10:28

Бүгінде Семей магистральдық желі бөлімшесіне қарасты мекемелер алдағы қысқа толықтай даярлық шараларын жүргізді. Соның ішінде байтақ Шығыс өңіріндегі барлық желі бойына қызмет көрсететін Семей электрмен жабдықтау дистанциясының қатал маусымға әзірлігі ерекше. Бұл ретте ұзын-сонар телім бойының ең күрделі аумақтары бірінші кезекте назарға алынған. Дистанция жетекшісі Нұрлан Әзімхановтың айтуынша, биылғы жаздағы жоспарлы шаралардың барлығы орындалған. Алдыңғы кезекте дистанцияға қарысты әуе желілері басым бөлігі ауыстырылып, 100-ден астам тіректері жаңартылған. Айта кетерлігі сол, бұл бағыттағы жұмыстар қар түскенге дейін, яғни, алдағы қараша айына дейін жалғасады. Бүгінгі таңның өзінде дистанцияға қарасты барлық трансформаторлық қосалқы станцияларда қосымша қызметтік тексерулер жүргізіліп, толықтай жаңартылып жатыр. Электрмен қамту ісі бойынша өндіріске тың жаңашылдықтар көптеп енгізіліп, жаңа құрылғылар мен аспаптар қолданысқа берілуде. Атап айтсақ осыдан біраз бұрын жоғары вольтті вакуумды қосқыш алынып, Аягөз, Шар, Семей станцияларына орнатылған болатын. Сондай-ақ, осынау құрылғылардың игілігін ендігі аралықта Защита және Шемонайха, Серебрянка станциялары да көре алатын болады. Дегенмен мұндай шалғай станцияларда күрделеніп келе жатқан мәселелер де аз емес. Бірінші кезекте арнайы біліктілігі бар мамандардың қажеттілігі сезілуде. Сонымен қоса, заманауи техникалар алу қажет. Себебі, Алтайдың шығыс сілемдерінде, таулы өлкелерде жұмыс істеуде біршама қиындықтар орын алады. Мәселен, Защита, Серебрянка сынды кенді өлкелерге қарасты орманды аумақта, желі жиегіндегі биік өскен қарағай бұталары электрмен қамтушылар жұмысына көп кедергі тудырады. Қар басқан ағаш бұталарының сынып, электр желілерін зақымдайтын кезі аз болмайды. Одан өзге таулы өлкелердегі сымдарға мұз да жиі қатады екен. Мұндай бұталарды шырпу үшін арнайы техниканың көмегі керек. Жалпы, аталмыш жұмыстар желі бойында ұдайы жүргізілуі тиіс болғандықтан машиналардың қажеттілігі сезілуде. Мекеме басшысының айтуынша, биылғы жазда табиғаты аса қатаң Защита өңірі бірінші кезекте назарға алынып, қысқа даярлық жұмыстарына да біршама басымдық беріліпті. Нәтижесінде Шығыс Қазақстан ЖТ бөлімшесіне қарасты барлық 22 станция мен 46 жол өткелдеріндегі құрылғылар 100 пайыз алдағы қысқа әзірленіпті. Бүгінгі таңда бұл аумақтағы желі бойында 588 темірбетонды арнайы тіректер бар. Дегенмен, 6608 ағаш тіректер кезеңімен жаңартылу үстінде. Бұл жұмыстар бойынша межелі шаралар уақытында орындалуда. Қазіргі күннің өзінде аталмыш өңірде ауа райы суытқанымен көзделген жұмыс барысы толастаған жоқ. Күзгі комиссиялық тексеру барысында анықталған кілтипанның барлығы соңғы бір ай ішінде толық жойылған.

Шығыс тармаққа басымдық берілді

Басқа да жаңалықтар

«Қазақстан теміржолшысы» газеті, №100 26 қараша 2024 жыл