Теміржолшылар қан тапсырды

Астанадағы Трансфузиология ғылыми-өндірістік орталығы және ҚТЖ-ның Адами ресурстарды басқару департаментінің ұйымдастыруымен компанияның орталық аппаратында донор күні өтті.

Аталған департаменттің бас менеджері Талғат Есгужановтың айтуынша, таңертеңгі сағат 09.00-де басталып 14.00-ге дейін созылған іс-шараға теміржолшылар белсенді атсалысты. Көп жылдан бері осы қайырымды іспен айналысатын 100-ден астам теміржолшы қан тапсырды.  

Бұл әлеуетті донорлар арасында 10-15 жылдан бері тұрақты түрде қан тапсырып келе жатқан теміржолшылар көп. Олар қашан да қайырымдылық акцияның бір бөлігі болуға және донорлық қозғалысқа өз үлесін қосуға асығады.  

– Донор деген кітапшам бар. 2015 жылдан бері қан тапсырып келемін. 52 жастамын, денсаулығым бойынша еш жерде тіркеуде жоқпын. Йогамен тұрақты айналысамын. Орталықта әлеуетті донор ретінде тіркеуде тұрғандықтан шұғыл қан керек кезде маған хабарласады. Қан тобым – 1, бұл топ бәріне жарамды. Қан тапсырғаның үшін еңбек демалысыңа қосымша күн қосылады. Бірақ біз ол үшін емес, өз денсаулығымыз үшін және хал үстінде жатқан науқастарға көмегіміз тисін, бір адамды болса да аман алып қалуға септік етейік деп донор болып жүрміз, – дейді «ҚТЖ-Жүк тасымалы» ЖШС департамент менеджері Назгүл Шугубаева.  

Теміржолшылардың көбі ауыз бекітіп, ораза ұстағанына қарамастан қан тапсыруға келген. Мамандар қан қысымы мен гемоглобині, холестерині дұрыс болса және майлы тамақ жемеген болса, оразаға қарамай қан тапсыруға болатынын айтады.