«Бақты – Аягөз» жобасы назарда
«Самұрық-Қазына» АҚ Басқарма төрағасы Нұрлан Жақыпов China Harbour Engineering Company (CHEC) ұйымының президенті Чжан Сяоцянмен ресми кездесу өткізді, деп хабарлайды Rail-news.kz.
Келіссөздер барысында тараптар инфрақұрылымдық жобалардың барысын талқылап, стратегиялық ынтымақтастықты нығайту мәселелерін сөз етті.
Кездесудің басты тақырыбы «Бақты – Аягөз» жаңа теміржол желісінің құрылысы болды. Тараптар бұл нысанның екі ел үшін стратегиялық маңызын атап өтіп, бір қатар мәселеге тоқталды.
Сондай-ақ жобаны белгіленген уақытында сапалы аяқтау қажеттігі айтылды. Аталған теміржол желісі іске қосылған жағдайда, Қазақстан мен Қытай арасындағы жүк тасымалы мен транзиттік әлеует едәуір ұлғаяды. Бұл бағыт екі мемлекет арасындағы сауда-экономикалық байланыстың жаңа дәлізіне айналмақ.
China Harbour Engineering Company (CHEC) бұл инфрақұрылым құрылысы бойынша әлемдік көшбасшылардың бірі саналатын China Communications Construction Company (CCCC) холдингінің еншілес ұйымы.
CHEC компаниясы CCCC-дің халықаралық нарықтағы негізгі операциялық бөлімшесі болып табылады.
Ұйым әлем бойынша күрделі инженерлік және логистикалық жобаларды іске асыруда үлкен тәжірибеге ие.
Бұл кездесу Қазақстанның транзиттік-көліктік хаб ретіндегі рөлін нығайтуға және Қытаймен арадағы ірі инфрақұрылымдық жобаларды жеделдетуге бағытталған маңызды қадам болды.