Баспасөзге қызмет – елге қызмет

Жаңалықтар

27.10.2017, 09:58

Арыс қаласында баспа өнімдерін жаздыртып, оқырмандарға таратумен айналысатын мекемелердің ішінде «Ердәулет-Тайма-Баспасөз» ЖШС-нің өзіндік орны бар. Биыл құрылғанына 10 жыл толып отырған серіктестіктің мерейтойы жаңадан бой көтерген, заманауи үлгідегі ғимаратқа кіруімен қатар келіп, серіктес мекеменің қуанышына біздің тілшіміз де ортақтасып қайтқан еді. Облыс орталығы мен аудандардан келген оңтүстікке белгілі баспасөз саласының майталмандары мен кәсіпкерлер мекеменің жетістігін атап өтті. Алғашқы кезде небәрі бес адамды еңбекке тартса, бүгінде мұнда жиырмадан аса азамат еңбек етеді. Он жылдың ішінде елеулі еңбек етіп, бүгінде қанатын кеңге жайған мекеме Шымкент, Түркістан қалалары, Сарыағаш, Ордабасы, Түлкібас, Отырар аудандарын да мерзімді басылымдармен қамтамасыз етіп отыр. Бүгінгі таңда серіктестік барлық деңгейлі газет-журнал редакцияларымен, "Қазпресс", "Евразияпресс" секілді алпауыт фирмалармен сенімді әріптес ретінде тығыз байланыс орнатып, мерзімді басылымдарды арыстықтардың әрбір шаңырағының рухани байлығына айналдыруда. Серіктестік биылғы жылдан бастап баспа өнімдерін шығарумен қатар мемлекеттік рәміз, мөр және мөртабан жасаумен айналысып, арыстықтардың баспа өнімдеріне деген сұрасыныстарын өтеуде. Бұрын арыстық мекемелер мен кәсіпорын қызметкерлері баспа өнімдері үшін облыс орталығына сабылса, қазір бұл жұмыстың барлығы да жергілікті жерде іске асырылуда. Сонымен қатар, осынау қуанышты күні серіктестіктің қызметкерлері мен баспасөз ардагерлері, мерзімді басылымдардың көптеп таралуына осы серіктестік арқылы атсалысып жүрген үздіктердің еңбектері жоғары бағаланып, олардың бәрі де сый-сияпат пен құрметке бөленді. Серіктестік қызметкерлерімен қатар баспасөз жанашырлары "Егемен Қазақстан", "Казахстанская правда", "Оңтүстік Қазақстан", "Южный Казахстан", "Айқын", "Жас алаш", "Қазақстан теміржолшысы ", "Рейтинг" сынды танымал басылымдардың Алғыс хаттарымен марапатталды. Шара соңында қонақтар арнайы жайылған дастарханнан дәм татып, «Баспасөзге қызмет ету – елге қызмет ету» деп ақжарма тілектерін білдірді.

Баспасөзге қызмет – елге қызмет

Басқа да жаңалықтар

Қазақстан теміржолшысы газеті, №49 26 маусым 2026 жыл