Денсаулық – ең үлкен байлық
«Қазақстан теміржолшысы» газетінің тілшісі
7 сәуір – Дүниежүзілік Денсаулық күніне орай «ҚТЖ» ҰК» АҚ Магистральдық желі дирекциясы филиалының Орталық аппарат қызметкерлері арнайы флешмоб өткізді.
Іс-шара барысында филиалдың 50 шақты қызметкері арнайы ақ футболкамен бас ғимараттың фойесіне шығып, әріптестеріне бір-бір алмадан таратты. Былтыр да осындай флешмоб өткізгенде олар бір алманы бір никотинге алмастырған болатын. Дирекцияның кәсіподақ комитетінің төрайымы Шолпанай Тажанова бұл күнді атап өтудегі мақсат салауатты өмір салтын сақтау екенін жеткізді.
– Өте үлкен ұжымбыз, жұмыс көп және уақыт аз. Соған қарамастан осы шағын іс-шара – флешмоб өткізуге көңіл бөлдік. Себебі адамның басты байлығы – денсаулық. Филиалдың Орталық аппаратында 485 адам, жалпы барлық өңірлер бойынша 61 мыңнан астам еңбек етеді. Олардың көбі спортты серік етіп, салауатты өмір салтын ұстанады. Іс-шаралардың бәріне белсенді қатысады. Биыл спорт комитеті де құрылды. Жақында теннистен бүкіл компания бойынша өткен жарыстан, волейболдан да біздің командалар 1-орын алды. Барша әріптестерімізге Денсаулық сақтау күнінде амандық, жұмыста табыс тілейміз, – деді кәсіподақ төрайымы.