Олжас Бектенов Қазақстанның логистикалық әлеуетін арттырудың басым бағыттарын атады
Премьер-министр Олжас Бектенов Теміржол ынтымақтастығы ұйымы (ТЖЫҰ) бас директорлары конференциясының 40-шы отырысына қатысып, еліміздің көлік-транзит саласындағы стратегиялық жоспарларын таныстырды. Үкімет басшысы Орта дәлізді дамыту, порттарды жаңғырту және саланы цифрландыру мәселелеріне ерекше тоқталды, деп хабарлайды Rail-news.kz.
Транскаспий халықаралық көлік бағытын (Орта дәліз) дамыту – мемлекеттің басты басымдықтарының бірі. Қазіргі таңда Ақтау және Құрық порттарында халықаралық инвесторлардың қатысуымен контейнерлік хабтар кеңейтіліп жатыр.
2029 жылға қарай тасымалдау көлемін жылына 80 мың ЖФЭ-ден (TEU) 300 мыңға дейін жеткізу көзделген.
Жүк жеткізу мерзімі қазірдің өзінде 18 тәулікке дейін қысқарды. Алдағы мақсат – бұл көрсеткішті 10 күнге дейін түсіру.
Сонымен қатар, Үндістан мен Парсы шығанағына шығатын ең қысқа жол – «Солтүстік – Оңтүстік» дәлізі де қарқынды дамып келеді.
Премьер-министр Мемлекет басшысының бастамасымен 2026 жылдың Цифрландыру және жасанды интеллект жылы болып жарияланғанын атап өтті.
«Қазақстан Президенті цифрлық технологиялардың дамуына зор мән бере отырып, 2026 жылды Цифрландыру және жасанды интеллект жылы деп жариялады. Осы орайда, қазіргі таңда TezCustoms платформасы енгізілуде. Ол Қытаймен шекарада рәсімдеу уақытын 8 сағаттан 30 минутқа дейін қысқартуға мүмкіндік берді. Аталған жұмыс басқа елдермен де жалғасуда», - деді Премьер-министр.
Қазақстан тек инфрақұрылымды салып қана қоймай, транзиттік уақытты барынша азайту мен процестерді толық автоматтандыру арқылы Еуразияның басты құрлықтық көпіріне айналуды көздеп отыр.