ҚТЖ мен Қытай мемлекеттік корпорациясы транзиттік әлеуетті дамытуға уағдаласты
«Қазақстан теміржолшысы» газетінің тілшісі
ҚТЖ ғимаратында ТЖЫҰ Бас директорлары конференциясының XL отырысы аясында компания басшысы Талғат Алдыбергеновтің Қытай темір жолдары мемлекеттік корпорациясы директорлар кеңесінің мүшесі, партиялық жетекші топ хатшысының орынбасары Ван Цзиньсимен кездесуі өтті.
Тараптар өзара үйлесімді әрі нәтижелі ынтымақтастықтың жоғары тиімділігін атап өтіп, бұл әріптестік екі елдің транзиттік-көлік әлеуетін жүйелі дамытуға мүмкіндік беріп отырғанын жеткізді.
Көрсеткіштердің тұрақты өсімін нақты статистика анықтап беруде. Мәселен, 2026 жылдың бірінші тоқсанының қорытындысы бойынша жүк тасымалы көлемі 9,3%-ға артып, 9,1 млн тоннаға жетті. Бұл Қазақстан мен Қытай аумағы арқылы өтетін көлік дәліздеріне сұраныстың артып келе жатқанын айқын көрсетеді.
Келіссөздер барысында Транскаспий халықаралық көлік бағдарын (ТХКБ) дамыту және тасымалдарды цифрландыру мәселелеріне ерекше назар аударылды. 2026 жылдың алғашқы тоқсанында ТХКБ арқылы 125 контейнерлік пойыз тасымалданып, бұл өткен жылдың осы кезеңімен салыстырғанда 34,4%-ға жоғары нәтиже көрсетті.
Инфрақұрылымды кеңейту бағытында да елеулі ілгерілеу бар. Тараптар Достық – Алашаңқай теміржол учаскесін салу жөніндегі үкіметаралық келісімді келісуде жедел әрі тиімді жұмыс атқарғаны үшін өзара алғыс білдірді. Сондай-ақ Бақты – Тачэн үшінші шекаралық өткелін салу жөніндегі құжатты келісуді жандандыруға уағдаласты.
ҚТЖ мен Қытай темір жолдарының өзара ықпалдастығы екі елдің экономикалық өсімінің маңызды драйверіне айналып, географиялық артықшылықты Шығыс пен Батыс арасындағы сауда байланыстарын нығайтудың қуатты құралына айналдыруда.