Орта дәлізді дамыту үшін күш біріктіруде

Теміржол ынтымақтастығы ұйымының мерейтойлық іс-шарасы шеңберінде ҚТЖ-ның ғимаратында компанияның басқарма төрағасы Талғат Алдыбергеновтің «Польша мемлекеттік темір жолдары» АҚ басқарма төрағасы, әрі Еуропалық теміржол және инфрақұрылымдық компаниялар қауымдастығын (CER) басқаратын Алан Бероудпен жұмыс кездесуі өтті.

Тарқатып айтқанда, CER, яғни Сommunity of European Railway and Infrastructure Companies – халықаралық тасымалды дамытуды қоса алғанда, салалық күн тәртібін қалыптастыратын Еуропаның жетекші теміржол және инфрақұрылымдық компанияларының бірлестігі. Қауымдастық 1988 жылы Брюссельде құрылды және 70-ке жуық теміржол кәсіпорындарын біріктіреді.  

Тараптар Транскаспий халықаралық көлік бағдарын дамыту шеңберінде одан әрі екіжақты ынтымақтастықты талқылады. Сонымен қатар олар Қазақстан мен Польша темір жолдары арасындағы стратегиялық ынтымақтастықты дамытуға бағытталған басқа да көптеген мәселелерді қарастырды. ҚТЖ мен Польша Мемлекеттік темір жолдарының тасымалдау компаниялары арасындағы жүк тасымалы саласындағы өзара іс-қимылға, сондай-ақ декарбонизация мен экологиялық таза технологияларды қоса алғанда, заманауи энергетикалық шешімдерді енгізу бойынша тәжірибе алмасуға басты назар аударылды.  

Екі елдің теміржол серіктестігі 2026 жылы өсу қарқынын көрсетуде, яғни I тоқсанның қорытындысы бойынша елдер арасындағы теміржол тасымалының жалпы көлемі 1,5 есеге артып, 752 мың тоннаға жетті.  

Қазақстандық экспорт құрылымында да оң динамика байқалады: Польша мемлекеті бағытында көмір жеткізу 6 есе, химиялық өнім экспорты 2,8 есе өсті, ал астықты жөнелту көлемі еуропалық нарықтардағы жоғары сұранысты көрсете отырып, бірнеше есе өсуді көрсетті.  

Бір мезгілде Қазақстанның негізгі транзиттік буын ретіндегі рөлі күшейе түсуде: Қытай – Польша бағыты бойынша контейнерлік тасымал 2026 жылдың алғашқы үш айында 44% ұлғайып, 75,4 мың ЖФЭ-ні құрады. Кездесу қорытындысы бойынша тараптар ТХКБ шеңберінде ынтымақтастықты одан әрі дамытуға дайын екенін растады.