Мақсат – іскерлік этиканы нығайту

«ҚТЖ» ҰК» АҚ-да корпоративтік мәдениетті қайта жаңғырту және имиджді нығайту бойынша ауқымды науқан басталды. Президент Қасым-Жомарт Тоқаевтың жақында БАҚ қызметкерлерін марапаттау рәсімінде айтылған тапсырмалары аясында бұл мәселе үлкен мәнге ие болып отыр.  

Мемлекет басшысы үлкенге құрмет, кішіге ізет, қамқорлық, жанашырлық және адамның қадір-қасиеті мен қауіпсіздігіне нұқсан келтіретін кез келген әрекетке жол бермеу халқымыздың басты құндылықтары екенін ерекше атап өтті. Бұл түрткі ойды негізге алған түсіндіру жұмыстары ҚТЖ компаниясының орталық аппараты мен филиалдары және еншілес ұйымдары қызметкерлерінің қатысуымен өткен кеңестерде кеңінен қамтылды. Кеңестің негізгі спикері, «ҚТЖ» ҰК» АҚ Іскерлік әдеп және имиджі жөніндегі уәкілі Шолпан Әбілбекова өз сөзінде компания ғасырлық дәстүрлерге негізделген дәл осындай өркениетті этикалық нормалардың тамырын жаюға ұмтылатынын атап өтті.  

Оның айтуынша, компания теміржол саласының әрбір қызметкерін осы құндылықтардың басты жолсерігі болуға шақырады, өйткені дәл осы әрбір теміржолшының жоғары жеке мәдениетінен ҚТЖ имиджі қалыптасады. Осы орайда өткізілген ауқымды кеңестер сериясы корпоративтік этика, іскерлік мәдениетті арттыру және ҚТЖ-ның оң имиджін қалыптастыру мәселелеріне арналды.  Бұл жүйелі жұмыс басшылықтың ерекше бақылауына алынып, барлық құрылымдық бөлімшелерде тұрақты негізде жалғастырылатын болады.

Бүкіл теміржол ұжымы үшін бұл принциптер күнделікті жұмыстың басты тәртібі  болып табылады. Мәселенің практикалық жағына ерекше назар аудару қажет. Олар: мінсіз іскерлік стилі, яғни дресс-кодты және жұмыс орнындағы сыртқы келбет стандарттарын сақтау; цифрлық гигиена – бұл дегеніміз, әлеуметтік желілер мен медиа кеңістіктегі қызметкерлердің сауатты, дұрыс және жауапты мінез-құлқы; сондай-ақ, коммуникация мәдениеті: қарым-қатынастың жоғары стандарттарын сақтау.

– Әрбір теміржолшы өз орнында бүкіл компанияның келбеті болып табылады, –  деді өз сөзінде Шолпан Ақылбекқызы, – Сондықтан теміржолда жұмыс істейтін әрбір қызметкер жеке мәдениетіне ерекше мән бергені абзал.

Кездесулер аясында компания имиджінің негізі әрқашан оның басты құндылықтары – адамдар болып қала беретіні айтылды. ҚТЖ-ның мақтанышы – теміржолда көп жылдар жұмыс істеп келе жатқан теміржолшы әулеттері, олар ұрпақтар сабақтастығын қалыптастырып, өз кәсібіне  адалдығымен көпшілікке үлгі-өнеге болып келеді.  Сондықтан да жаңартылған этикалық саясат еңбек адамын дәріптеуге  бағытталып отыр. Іскерлік этиканың жаңартылған стандарттарын енгізу бойынша ауқымды түсіндіру және оқыту жұмыстары барлық өңірлерде, компанияның, құрылымдық бөлімшелерінде де жалғасатын болады.