Қызметтік иттердің көмегімен теміржолда 74 есірткі дерегі анықталды
Көлік полицейлері жыл басынан бері теміржол нысандарында қызметтік-іздестіру иттерінің көмегімен есірткі заттарын заңсыз тасымалдау мен сақтауға қатысты 74 құқық бұзушылықты анықтағандарын мәлімдеді, деп хабарлайды Rail-news.kz.
Көліктегі полиция департаментінің кинолог-мамандары қызметтік иттермен бірге теміржол вокзалдары мен жолаушылар пойыздарында тұрақты профилактикалық және іздестіру жұмыстарын жүргізіп келеді. Тексеру барысында жүк бөлімшелері, сақтау камералары мен күту залдары қамтылады.
Сонымен қатар еліміздің оңтүстік өңірлерінен келетін және Қырғызстан мен Өзбекстан бағытында қатынайтын халықаралық жолаушылар пойыздарына ерекше назар аударылады. Теміржол арқылы тасымалданатын пошта жөнелтілімдері мен бандерольдер де тұрақты тексеріледі.
Жыл басынан бері көлік полицейлері қызметтік иттерді жалпы 3335 рет қолданған. Нәтижесінде 78 есірткі құқық бұзушылығы анықталып, заңсыз айналымнан 160 келіден астам түрлі есірткі заты тәркіленді.
Анықталған құқық бұзушылықтардың басым бөлігі теміржол көлігі нысандарына тиесілі. Атап айтқанда, 63 дерек теміржол вокзалдарында, тағы 11 дерек жолаушылар пойыздарында тіркелген.
Ірі фактілердің бірі биыл маусым айында «Қарасора–2026» жедел-профилактикалық іс-шарасы кезінде анықталды. Түрксіб станциясының аралығында қызметтік-іздестіру итінің көмегімен 103 келіден астам марихуана табылып, тәркіленді. Нәтижесінде есірткі жеткізудің ірі арнасының жолы кесілді.
Көлік полициясының кинологтары қызметтік иттердің есірткі және басқа да тыйым салынған заттарды анықтау дағдыларын жетілдіру үшін тұрақты түрде жаттығу жұмыстарын жүргізеді.