Әулеттің үшінші буыны

Жаңалықтар

30.03.2018, 17:31

Ақтөбе электрмен жабдықтау дистанциясының қауіпсіздік жөніндегі бас маманы Нұрбол Жанділдаевтың теміржол бойындағы еңбек өтілі бар-жоғы төрт жыл. Бірақ атасы сүрлеу салып, әкесі жалғаған теміржолшы әулетінің бай тарихы тұрғанда өзін салаға кеше келген жан санамайды. Жас теміржолшы еңбек жолын қара жұмыстан бастаған. Сосын Никельтау станциясында электрмонтер болып жұмыс істеді. Кейін Ақтөбедегі электрмен жабдықтау ауданында аға электрмонтер қызметін атқарды. Шалқар ауданының Шоқысу станциясында теміржолшылар отбасында дүниеге келген Нұрболдың атасы сол Шоқысуда жол шебері болған, ал әкесі дефектоскоп машинасының операторы. «Атамнан тараған ұрпақ бүгінде Шалқарда, Оралда, Ақтөбеде еңбек етіп жатыр. Ал біз өзіміз отбасыда төрт баламыз. Екі әпкем бар. Інім де теміржолшы, бүгінде әкемнің қасында», – дейді ол. Нұрбол орта мектепті бітірген жылы Ақтөбедегі Көлік, коммуникация және жаңа технологиялар колледжінде «электрик-механик» мамандығы бойынша білім алады. Оқу бітірген бойда Отан алдындағы әскери борышын өтеп келеді де, араға алты ай салып, болат жолдың бойындағы еңбек жолын бастап та кеткен. «Бүгінде қозғалыс қауіпсіздігіне тікелей жауапты қызметкермін. Біздің қарамағымызда жеті желілік аудан бар. Олар Ақтөбе, Шұбарқұдық, Әйтеке би, Орал, Қандыағаш, Никельтау және Қазақстан станцияларында орналасқан. Пойыздардың үздіксіз электр қуатымен қамтамасыз етілуін қадағалап отырамыз», – дейді Нұрбол Жанділдаев. Жоспар құру, пысықтау, тексеру, қадағалау, т.т. қат-қабат жұмыстан бөлек, кабинетте отыруды жаны сүймейтін бас маман жол бойына жиі шығып, өндірісті аралағанды, кем-кетікті көзбен көріп, басында шешкенді дұрыс көреді екен. «Отбасы, ағайын-туыстан бөлек жолдастарымның көбі бірге оқыған, қызметтес жігіттер теміржолшылар болғандықтан бізде кез келген басқосуда ортақ әңгімеміз – теміржолдағы жаңалықтар. Кейде өзімді тек теміржолшылардан тұратын мемлекетте өмір сүріп жатқандай сезінемін» деп әзілдейді жас маман. Нұрбол Жанділдаев – екі баланың әкесі. Осы ақпан айының аяғында егіз ұлы Нұрислам мен Нұриман екі жасқа толады екен. Кім біледі, жас отбасында екі бірдей теміржолшы өсіп келе жатқан шығар...

Әулеттің үшінші буыны

Басқа да жаңалықтар

Қазақстан теміржолшысы газеті, №108 26 желтоқсан 2025 жыл