Атбасарлық вагон қараушы күрделі ақау тауып, болуы мүмкін апаттың алдын алды
![](https://rail-news.kz/uploads/posts/2019/1/14/1547452323161.jpg)
Атбасарлық вагон қараушы Александр Кучма жаңа жыл алдында күрделі ақау тауып, тағы бір болуы мүмкін ықтимал апаттың алдын алды.
Жаңа жылға бір күн қалғанда, 30 желтоқсан күні түнгі ауысымға шыққан Александр Есіл станциясынан Астанаға бет алып, Атбасарда тоқтаған жүк пойызын тексеру барысында оның соңғы жағындағы бос вагоннан бүйір рамасы ақауын тапты. 4 разрядты вагон қараушы және жөндеуші тапқан ақау – әдеттегідей бүйір рамасының сызаты. Сызаттың ұзындығы – 580 мм. Жұмысын адал атқарып, отбасын асырап отырған елуді еңсерген теміржолшының бұл 2018 жылдың басында тапқан бір ақауынан кейінгі екінші жетістігі. Жолдастары қалжыңдап: «Біздің Саша жылдың басында бір, соңында бір есеп береді» деп жүр екен...
– Қозғалыс қауіпсіздігін қамтамасыз ету – біздің басты ұранымыз. Сондықтан күн-түн демей жұмыста өз ісімізді адал атқарсақ, сол абыройымыз. Жұмыста мұқияттылық, тәртіпке бағыну – теміржолшының басты міндеті. Теміржолдағы тұрақтылық, табыс көзі бүгінде отбасымызбен оған қызмет етуге алып келді. Жұбайым да теміржолшы, балам да локомотив депосында слесарь. Кезінде анам да ұзақ жыл осы Атбасарда электровозда экипировкада еңбек еткен. Міне, отбасымыз түгел осы өзіміз туып-өскен жерде нәпақамызды тауып жүрміз, – дейді қырағы вагон қараушы.
Бір ауысымда 15 әріптесімен пойыздарды тексеруге шығатын Александрды басшылық та, ұжым да ерекше құрметтейді. 2006 жылы теміржолда еңбек жолын бастағанда ағымды ағытып жөндеу цехында слесарь болған ол соңғы 5-6 жылдан беру вагон қараушы жұмысын атқарып жүр. Атбасарда туып, осы бір байырғы станцияда бүкіл өмірін өткізіп келе жатқан ол үшін өз туған мекенінен артық жер жоқ.
Вагон қараушының міндетіне кіретін – пойыздар қозғалысы қауіпсіздігіне қауіп төндіретін кемшіліктерді анықтау үшін контейнерлер мен вагондардың асты-үстін техникалық тексеру, тасымалдаудағы жүктер мен жылжымалы құрамның сақталуын бақылау қызметтерін мұқият орындайтын атбасарлық вагоншылар қашан да қосынның ел теміржолы көлемінде жақсы нәтиже көрсетуіне атсалысып жүр. Қолдарынан вагондардың жүріс бөлігіндегі, шанағы мен бөлшектеріндегі олқылықтарды анықтауға арналған қару-сайманын тастамай, кемшілік табылған жағдайда акт толтыру да, ақаулы вагонды ағытып, ағымды жөндеуге жіберу де осы вагон шаруашылығы мамандарының жұмысы. Өз жұмыстарын кәсіби талаптарға сай дұрыс атқару үшін вагоншылар нұсқаулықты, техникалық қызмет көрсету ережелері мен оларды жөндеудің жоспарлы түрлерінің мерзімі, вагондарды ағытпай жөндеу технологиясы мен ережесі, вагон паркін сақтау мәселелері бойынша нұсқау, техникалық құжаттаманы рәсімдеу жолы, пойыздық белгі берулер мен жөндеу барысында пойыздарды қоршау тәртібі, вагондарды тексеру барысында қолданылатын шаблондар, оларды өлшеу құралдары мен қолдану реті туралы егжей-тегжейлі білулері керек.
Нұрай СӘРСЕНҒАЛИ
Суретті түсірген автор