ҚТЖ басшылығы Павлодар өңірінің жүк жөнелтушілерімен кездесті
Павлодар қаласында өңірдің ірі жүк жөнелтушілерімен ҚТЖ басшылығының кеңесі болып өтті. Жүк тасымалының ағымдағы мәселелері, жылыту маусымына дайындық пен үйлестірілген және тиімді жұмыс істеу жағдайлары талқыланды, деп хабарлайды Rail-news.kz.
2024 жылдың жеті айында Павлодар жүк тасымалдау бөлімшесі 44,5 млн тоннадан астам жүк тиесе, оның ішінде ТМД елдері бағытында 9,3 млн тоннадан астамы, ҚХР-ға 630 мың тоннадан астамы жөнелтіліп отыр. Өңірде көмір, темір кені, алюминий тотығын жеделдетілген маршруттық пойыздармен - бір жөнелтушіден бір алушыға тұтас құрамдармен тасымалдау бойынша белсенді жұмыс жүргізілуде. Ақсу-1 станциясынан Достыққа дейін экспресс-пойыздармен ферроқорытпалар жеткізіледі. Бұл тәсіл құрамдардың жүру уақытын қысқартып, жүктің сақталуын қамтамасыз етті. Маршруттау Павлодар мұнай-химия зауытынан елорда арқылы шығыс және оңтүстік бағыттарға құйылмалы мұнай жүктерін тасымалдауда енгізілуде. Павлодар алюминий зауыты өз өнімдерінің 70% жүк маршруттарымен экспортқа жібереді.
Жылыту маусымына көмір тасымалдау өңірде кесте бойынша жүріп жатыр. Павлодарлық теміржолшылар ЖЭО, МАЭС қоймаларындағы қатты отын қалдықтарына тәулік сайын мониторинг жасайды. Қатты отын қорлары 2024 жылдың тамыз айының соңында белгіленген нормалардан едәуір артты және 1,6 млн тоннадан асады, бұл өткен жылдың ұқсас кезеңі көрсеткішінен 11% жоғары.
Павлодар және Ақмола облыстарының тұрғындары үшін 12 мың тонна қатты отын тасымалданды, бұл өткен жылдың сәйкес кезеңінен 20% артық. "Богатырь Көмір" ЖШС көмірді орташа тәуліктік тиеу 30-32 маршруттық пойызға дейін жетеді.
Кездесуде өзара тиімді ынтымақтастықты одан әрі нығайту үшін компанияның жүк жөнелтушілерімен сындарлы диалог жүргізу қажеттілігі атап өтілді. Кеңес қорытындысы бойынша бірқатар жүк жөнелтушілер теміржолдың 120 жылдығына орай мерейтойлық медальмен марапатталды.
