Шымкентте 3 мыңға жуық балаға көмек көрсетіледі
Түркістан облысы бойынша меншікті тілші
«Жүк тасымалы» ЖШС Шымкент филиалы мен Шымкент магистральдық желі бөлімшесінің және «Қазкөліккәсіп» ҚБ Шымкент филиалының ұйымдастыруымен жаңа оқу жылы қарсаңында 3 мыңға жуық балаға көмек көрсетіледі.
«Мектепке жол» республикалық акциясы аясында қайырымдылық шаралар жыл сайын дәстүрлі түрде өтеді. Одан бөлек, теміржолдан берілетін қолдау-көмек те аз емес.
– Біздің өңірде теміржол мекемелерінде еңбек ететін отбасыларда 3 немесе одан көп баласы мектепке баратын әріптестеріміз аз емес. Ұжымдық шартқа сәйкес олардың әрбіріне 4 АЕК шамасында қаржылай көмек көрсетілді. Биыл мұндай қаржылай қолдауға 2 500 теміржолшы отбасының балалары ілінді, – дейді Шымкент ЖТ кадр бөлімінің әлеуметтік және еңбек қатынастары инспекторы Жұлдызай Қайсарова.
Сол сияқты 3, 4, 5-класты станцияларда жұмыс істейтін теміржолшылардың биыл бірінші сыныпқа баратын балалары да тиісті жеңілдіктерін алуда. Оларға ішіне құрал-жабдығы жинақталған арнайы сөмкелер үлестірілген. Оған қоса, «Отбасы күніне» орай ұл-қызының саны төрттен жоғары әрбір теміржолшының жалақысына 5 АЕК көлемінде бір реттік қосымша қаржылай қолдау көрсетілген.
Бұдан басқа «Мектепке жол» акциясы аясында теміржолшылардың мектеп табалдырығын аттайтын балаларына құрал-жабдықтар салынған арнайы сөмкелер де табыс етілуде екен.