Ақтөбеде жолаушылар вагонының тұрағында жолсерікті тонамақ болған күдікті ұсталды

Ақтөбеде жолаушылар вагонының тұрағында жолсерікті тонамақ болған күдікті ұсталды. Қарақшының шабуылынан аман қалған жолсерік өзіне араша болған атқыштар командасының күзетшілеріне алғыс айтады.    

Оқиға ағымдағы жылдың 17 қаңтар күні кешке орын алған. Кезекті сапардан оралған соң вагонды жуып тазартып, жолаушы пойыздары тұрағынан қалаға қайтып бара жатқан жолсерік қолындағы сөмкесін ала қашқанның кім екенін де білмейді, артынан қуып айғайлап қала береді. Оның дауысын естіп қалған сол маңда кезекшілікте жүрген «Әскерилендірілген теміржол күзеті» АҚ Ақтөбе филиалының күзетшілері қашып бара жатқан адамды қуып жетіп ұстап алады.   

Сөмке иесіне қайтарылып, қазірде күдіктіге қатысты тергеу амалдары жүріп жатыр.

«Мен әскерилендірілген күзет қызметкерлеріне алғыс білдіремін. Жағдайға бей-жай қарамай, көмек қолдарын созды. Күзетшілер болмаса ішінде ақшасы бар сөмкемді алып кететін еді. Оқыстан шыққан адам мені ұрып, лезде қолымдағы затты тартып алып қашып кетті», – дейді жолсерік.

Күзетшілерге алғыс білдірген теміржолшы жеке қауіпсіздікке байланысты аты-жөнін жарияламай-ақ қоюды өтінді. Болған оқиғаны Қазақстан Республикасы «Әскерилендірілген теміржол күзеті» АҚ-ның Ақтөбе филиалы мекемесінің қызметкерлері растап отыр.

Ақтөбе атқыштар командасының топ басшысы Нұрбек Нағашыбаев жолсерікке араша болған «Әскерилендірілген теміржол күзеті» қызметінің атқыштар командасының Арман Садубаев пен Бөкенбай Садубаев есімді күзетшілері екенін жеткізді. Олар мекемеде үш жылға жуық еңбек етіп келе жатқан қызметкерлер екен.