Қазақстан, Ресей және Беларусь теміржол әкімшіліктері Еуразиялық теміржол альянсын ары қарай дамыту мәселелерін талқылады

Қазақстан, Ресей және Беларусь теміржол әкімшіліктері Мәскеуде бас қосып, Бірлескен көліктік-логистикалық компаниялар – Еуразиялық теміржол альянсын (БКЛК ЕР) ары қарай дамыту мәселелерін талқылады.  

«Қазақстан темір жолы» ҰК» АҚ Басқарма төрағасы Сауат Мыңбаев, «Ресей темір жолдары» ААҚ Басқарма төрағасы О.Белозеров, «Беларусь темір жолы» МБ басшысы В.Морозов 2018 жылғы БКЛК ЕРА жұмысының қорытындысын шығарды және 2019 жылға арналған міндеттерді қарады. Теміржол әкімшіліктерінің басшылары алдын ала жасалған «2025 жылға дейінгі кезеңдегі «БКЛК» АҚ дамыту стратегиясында» келісілген жоспарлы көрсеткіштермен салыстыру арқылы 2018 жылы тасымал көлемі артып отырғандығын атап көрсетті.  

2017 жылмен салыстырғанда тасымалдың 60% артуы, соның ішінде жаңа транзиттік бағыттар бойынша тасымал көлемінің өсімі есебінен жоспардан артық қаржылық нәтижеге қол жеткізілді. Шығыс-Батыс бағытына контейнерлік пойыздарға тиеу 65% дейін көбейді. Қосымша сервистер мен базалық бағыттар бойынша ұзынқұрамды контейнерлік пойыздар үшін экспериментальді «өтпелі» технологиясы енгізілген.

Тараптар контейнерлік пойыздардың «өтпелі» жылдамдығын 1150 км/тәулік деңгейіне жеткізу, жүк тасымалдау көлемінің тұрақты өсімін қамтамасыз ету үшін базалық инфрақұрылымдық тарифтер құруды 2019 жылы да сақтап қалу жайын сөз етіп, ЕАЭО шеңберінде интеграциялық процестерді дамыту үшін БКЛК жобаларын жүзеге асыру маңызын атап көрсетті.

Кездесуде, сондай-ақ, «БКЛК ЕРА» АҚ акционерлік келісімі жобасын әзірлеу мәселелері талқыланды және қорытындысы бойынша тиісті хаттамаға қол қойылды.

Қызғалдық ЖАҚЫПБЕКОВА