Күн райының құбылуына байланысты Қызылорда теміржол вокзалы маңында қауіпсіздік шаралары қолға алынды
![](https://rail-news.kz/uploads/posts/2019/1/31/1548924229572.jpg)
Сыр өңірінде біресе қар жауып, одан сібірлеп жауған майда жаңбыр әп-сәтте қала көшелерін көк мұзға айналдырып, халықтың емін-еркін жүріп-тұруына кедергі келтіріп, қауіп төндірді.
Әсіресе, вокзал алаңы мен перрон кәдуілгі мұз айдынына айналғандай, жолаушылар үшін қауіп пен қолайсыздық туғызып, қозғалыс қауіпсіздігінің сақталуына кедергісін тигізуде. Алайда, вокзал шаруашылығы қызметкерлері жолаушы халықтың жағдайын жасау үшін бар мүмкіндікті жасауда. Олар жаяу жүргіншілердің жолына тұз бен құм сеуіп, тепкішектерді мұздан тазалап, Нұрым Бейсенбай мен Бақытбек Әбіловтар бастаған жұмысшылар екі күн бойы маңайды жалтыраған көк мұздан тазартты. Бірнеше вокзал қызметкерлері тепкішектерден түсіп-мінетін қарт кісілерге, балалы әйелдерге көмектесіп, қажет жағдайда пойызға дейін апарып салумен айналысуда.
Үшінші күн тұз көк мұзды ерітіп, жолаушылардың қауіпсіз жүріп тұруына біршама мүмкіндік туды. Десе де, вокзал ұжымы қауіпсіздік шараларын жалғастыруда.
Сабырхан СЕЙІЛБЕКҰЛЫ, Қызылорда
Суретті түсірген автор