«ҚТЖ» ҰК» АҚ 2018 жылдың жұмысын қорытындылады және 2019 жылдағы міндеттерді айқындап алды
«Қазақстан темір жолы» ҰК» АҚ Басқарма Төрағасы Сауат Мыңбаевтың төрағалығымен өткен кеңес отырысында 2018 жылғы жұмыс қорытындысы талқыланды және 2019 жылдағы міндеттер айқындалды, деп хабарлайды ұлттық компанияның баспасөз қызметінен.
2018 жылдың өндірістік қызметінің негізгі параметрлері бойынша жыл оң нәтижемен аяқталды. 283 млн. тонна жүк тасымалданса, бұл 2017 жылғыдан 11 млн. тоннаға артық. Транзит 10% көбейіп, 17 млн. тоннадан асты. Пойыздармен шамамен 18 млн. жолаушы тасымалданды. 1000 км теміржол желісі тартылса, соның ішінде 867 км күрделі жөндеуден өткізілді.
Бұл ретте жылдың қорытындысы бойынша теріс қаржылық нәтижені қарыздық ауыртпалықтар тудырды. Осыған байланысты әрбір басшының жеке жауапкершілігін арттыру, сатып алу рәсімдерінің ашықтығын қамтамасыз ету, шығындарды оңтайландыру, ресурстарды тиімді пайдалану жөніндегі шаралар қабылдануда.
Компания жұмысындағы негізгі басымдық қозғалыс қауіпсізіді мен инфрақұрылымдар қауіпсіздігін қамтамасыз ету болып қала береді. Бұл екі сегмент, инвестициядан өзге, өзгеріп жатқан жағдайға бейімделеді және үнемі назар аударуды талап етеді.
Бұл ретте өндірісте нөлдік жарақатқа қол жеткізу, еңбек жағдайы қауіпсіздігі, қозғалыс қауіпсіздігін қамтамасыз етуге ерекше назар аударылып келеді.
Кеңес отырысында сондай-ақ 2019 жылға арналған транзитті дамыту және тасымал көлемін арттыру міндеттері тағы бір пысықталды. Алға қойған міндеттерге қол жеткізу үшін ұйымдастыру құрылымдарын жеңілдету, тариф саясатын, реттеу ортасын өзгерту жөніндегі және даму стратегиясын жаңарту жұмыстары жүргізілуде. «ҚТЖ» ҰК» АҚ құрылымында тек негізгі жұмыспен байланысы бар салалық компаниялар ғана қалады.