Қызылорда ЖТ бөлімшесі мен Қазалы вагон пайдалану депосы ұжымдары «ҚТЖ-ЖТ» АҚ басшылығының марапатын иеленді
Жылжымалы құрамдардың қозғалыс қауіпсіздігін сақтауды жетілдіру және оның шараларын арттыра түсу мақсатында өткен жылы жарияланған техникалық оқу айлығының нәтижесінде Қызылорда ЖТ бөлімшесі мен осы бөлімшеге қарасты Қазалы вагон пайдалану депосы ұжымдары «ҚТЖ-ЖТ» АҚ басшылығының марапатын иеленді.
Бөлімшенің техникалық бөлім басшысы Жарқынбек Рсымбетовтің айтуынша, бір айға жарияланған техоқу айлығы барысында бөлімше мекемелерінде техникалық сабақ өткізілетін кабинеттерде қарбалас жұмыс жүргізіліп оның бәрі жеке құрамның теориялық білімін арттырып, тәжірибесін шыңдауға мән берілген.
– Өткен жылы жарияланған техникалық оқу айлығы нәтижесінде жекеленген мекемелердің бір айда өткізген табанды жұмысы «ҚТЖ» басшылығы тарапынан оң бағасын алып Қызылорда ЖТ бөлімшесі «үздік техникалық кабинет» және «үздік видоеролик» аталымында екі ІІ орын, ал Қазалы вагон пайдалану депосы «үздік техникалық кабинет» номинациясында І орын, «үздік ролик» аталымында ІІ орын иеленіп отыр, – дейді техбөлім басшысы.
Еске сала кетсек, өткен жылы жаппай жүргізілген техникалық оқу кезінде техникалық сабақтардың сапасын арттыру және тиімділігіне басымдық беру мақсатында «техникалық оқуға айрықша назар бөлу» айдарымен бір айлық мерзімге айлық жарияланған. Әрине, тек айлық кезінде ғана емес, жылдың барлық мерзімінде бекітілген кесте бойынша мамандар біліктілігін арттырып, олардың өндірістік жұмыстар кезінде теориялық білімі мен тәжірибесін арттыру мақсатында өткізілетін техсабақтардың орны ерекше екені рас. Себебі теориялық жағынан қарайып қалған мамандар болса, сол сабақ барысында ұмытқанын еске түсіріп, білімін шыңдай түседі. Айлық кезінде жаңаша сипатта жүргізілген техсабақтар заман талабына сай жаңа форматта өткізіліп, бөлімше теміржолшыларының білім-білігін арттыруға сеп болды.
Сонымен қатар техникалық сабақ өткізілетін кабинеттер оқу стендісімен, макеттермен, сандық технологиялық құралдармен жарақталды және қосымша пайдаланылатын құрал-саймандармен толықтырылды. Қазіргі таңда өткен жылы басымдық берілген техникалық білімді арттыру шаралары жалғасын табуда.
Сабырхан СЕЙІЛБЕКҰЛЫ, Қызылорда