«ҚТЖ.kz» командасы жүлде алды
Осы жылы ақпан айының басында Қазақша КВН одағының ұйымдастыруымен өткен Жайдарман ойындарының ХХ маусымашарына теміржолшылар командасы да қатысты, деп хабарлайды "Қазақстан теміржолшысы" газетінің тілшісі.
«Маусымашар-2019» республикалық фестивалінде теміржолшылар атынан өнер көрсеткен «ҚТЖ.kz» командасы құрамында «Нұрлы жол» вокзал кешенінің қызметкерлері Бейімбет Ұласбек пен Олжас Ахметов те болды. Команда ойын нәтижесінде «Жақсы өнер көрсеткені үшін» дипломымен марапатталды.
Команда капитаны Бейімбет Ұласбектің айтуынша, 8 адамнан құралған теміржолшы жайдарманшылар жарыстың бірінші турынан өтіп, екінші турына жолдама алған. Оларға еліміздің танымал сатиригі Көпен Әмірбек пен белгілі тележүргізуші Дана Нұржігіт бастаған ел азаматтары қазылық еткен.
– Еліміздің барлық өңірлерінен ең мықты деген жайдарманшы теміржолшыларды іріктеп алдық. Оларды көпшілігі – өзіміздің ҚТЖ ішінде өтетін КВН жарыстарда көзге түсіп жүрген жастар. Олардың қатарында Маңғыстау, Қызылорда, Жамбыл, Ақмола облыстарынан жиналған команда құрамы жолсеріктер, пойыз беруші, транзит бойынша агент, машинист көмекшісі, жолшы, бірінші дәрежелі инженер және вокзал кезекшілері бар, – дейді команда капитаны.
Қазақстанның түкпір-түкпірінен келген командалар арасында ҚТЖ ойыншылары қазіргі қоғамдағы өзекті мәселелерді астарлы әзілмен түйреп, халыққа күлдіре отырып жеткізген. Бір аптаға созылған жарыс соңында олар биыл наурыз айында Арулар мерекесі қарсаңында өтетін жарысқа жолдама алған. Бейімбеттің айтуынша, ҚТЖ командасы сол кезде де осы құраммен өнер көрсетпек. Ал компания көлемінде аталған мерекеге орай өтетін салтанатты шарада КВН командасы астаналық теміржолшылардың қатысуымен өнер көрсетпек.
Ұлан ОРАЗ