Семейде футзалдан теміржолшылар біріншілігі өтті
Семей ЖТ бөлімшесі бойынша футзалдан теміржолшылар біріншілігі болып өтті. Шығыстағы сала мамандары ең танымал осынау спорт түрі бойынша мықтыларды анықтау мақсатында екі күн қатарынан ептілік пен шеберлік жағынан сынасты.
Аталмыш байқауға бөлімшеге қарасты теміржол мекемелерінен 9 команда қатысып, алдын-ала өзара кездесулер өткізген болатын. Қаладағы «Спартак» стадионының арнайы жабдықталған кең залында өткен жарысқа жанкүйерлер қауымы мол жиналды. Әсіресе, сайыстың екінші күні мейлінше тартысты өрбіді. Себебі, бұл күні финалдық ойындар өтіп, топ ішінен суырылып шыққан төрт команда жүлделі орындарды сарапқа салған болатын.
Әдеттегідей, соңғы мәреге бөлімше чемпиондары жетті. Дегенмен, осыған дейін футзалдан ешкімге дес бермей жүрген Семей станциясының футболшылары бұл жолы ашылып ойнай алмады. Желаяқтығымен танылған Алмас Жақсыбаев, Марат Игенбаев сынды сұрмерген шабуылшылар тепкен доптардың көбісі қарсыластар қақпасынан қиыс кетіп жатты. Нәтижесінде аталмыш команда жүлделі үшінші орынды қанағат тұтты.
Ал, спорттық ойындардан шеттеп жүретін «Транстелеком» Семей филиалының командасы бұл жолы көпшілікті таң қалдырып, бәрін шаң қаптырып, екінші орынды жеңіп алды. Жаңадан жасақталған команда ойыншылары ендігі аралықта мұндай сайыстардан қалмайтындарын жария етті.
Ал, бірінші орынды баскетбол мен волейболдан бөлімше чемпионы атанған Семей байланыс және белгі беру командасы футболшылары иеленді. Жігіттерді қолдауға ШЧ-29 басшысы, өзі де спортшы Бейбіт Түменғали арнайы келіпті. Сондықтан, жігіттерінің жерге қаратпағанына дән риза екенін жасырмай күліп тұрды. Барлық жеңімпаздар кубогпен марапатталып, мақтау қағаздарын иеленді.
Қуаныш ҚОЖАЕВ