Семейде көктемгі комиссиялық тексеру 3-ші мамырға дейін жүргізіледі
Семей ЖТ бөлімшесі бойынша жылдағы қызметтік дәстүрге сай көктемгі комиссиялық тексеру жұмыстары басталды. Сәуір айының 18нен бастау алған шара барысы 3-ші мамырға дейін жүргізілетін болады.
– Биылғы көктемгі бақылау жылдағы уақыттан кештеу басталды. Оған себеп шалғайдағы станциялар мен мекемелер теміржолшылары комиссиялық тексеру шараларына толық даярлық жүргізіп алсын дедік. Оның үстіне Ақтоғай – Аягөз – Жарма телімі бойынша қалың қар жатып, кештеу еріді. Жол шаруашылығындағы барлық құрылғыларды сүзгіден толық өткізіп шығу үшін қосымша уақыт қажет болды, – дейді Семей ЖТ өндірістік техникалық бөлімінің қызметкерлері.
Апта бейсенбісінде басталған комиссиялық тексерулер биыл Дегелең – Жаңа-Семей телімінен басталды. Бірінші класты сыныпты жүк станциясында тораптық кеңес өткізіліп, бірқатар мәселелер сарапқа салынды. Қозғалыс қауіпсіздігі департаментінің Семей аймағы бойынша бас ревизоры Сайлау Юсупов келелі баяндама жасап, семейлік сала қызметкерлерінің олқы тұстары сынға алынды. Тексеру жұмыстары осыдан соң Локоть – Семей телімі бойынша жалғаспақ. Мұндағы Ауыл, Белағаш, Дүйсекен, №41 жол айрығы бойынша жазғы жұмыстарға әзірлік барысы тексерілетін болады. Ал, Ақтоғай – Аягөз – Жарма мен Шар – Жаңа-Семей телімдері алдағы аптаға жоспарланған.Сондай-ақ, Семей мен Жаңа-Семей станциялары бойынша ең соңынан кең көлемде тексеру жүргізілмек. Сонымен қатар, осынау тексеру жұмыстары барысында Аягөз бен Шар және Семей қалаларында тораптық жиындар өткізіліп, қысқы жұмыс қорытындысы жасалынып, жазғы маусымдағы межелі шаралар талқыланбақ. Ал, көктемгі комиссиялық тексеру жұмыстарының нәтижесі мамыр айының 15-і күні өткізілетін жиында сарапқа түспек.
Қуан ЕРТІС