Ақтобеде тыл ардагеріне материалдық көмек көрсетті

«ҚТЖ» ҰК» АҚ – «Ақтөбе магистральдық желі бөлімшесі» филиалының директоры Серғали Жайлаубай тыл ардагері Рахила Қанатбаеваны Жеңіс күнімен құттықтап барды. Зұлмат заманды көзімен көрген ардагерлердің үйіне азық-түлік себеттерін апарып, материалдық көмек көрсетті.

Бүгінде 93 жасты бағындырған кейуана қонақтарын қуана қарсы алды. 1926 жылы Шалқар қаласының Талдықұм ауылында туған ол соғыс жылдары госпитальда жаралы жауынгерлерге көмектесіпті. Елге келгеннен кейін де қаршадайынан қара жұмысқа араласып, депода жұмыс істеп, цехта шойын балқытып, оқ-дәрі құйған.

«Аға ұрпақтың ерлігі мен қаһармандығының куәсі болған сіздей жанға құрметіміз қашан да жоғары. Ұлы Жеңіске қосқан үлесіңізді бүгінгі ұрпақ ұмытпақ емес, бақуатты өмір кешіп, жүзге келіңіз, апа», – деп тілек білдірді кейуанаға Ақтөбе магистральдық желі бөлімшесінің директоры Серғали Жайлаубай.

Оның айтуынша, қазір Ақтөбедегі магистральдық желі бөлімшесінде 4 соғыс ардагері қалған.

«Біз де сендердей жас болғанбыз. Соғыс даласына мектептен аттандым, окоп қаздық. Кейін Шалқардағы депода ұзақ жыл еңбек еттім. Ып-ыстық шойын балқыттық. Бүгінгі сендердің көрсетіп жатқан құрметтерің сол кездегі маңдай тердің жемісі болар. Өркендерің өссін», – деді тыл ардагері Рахила Қанатбаева.