Оңтүстікте ардагерлерді Жеңіс мерекесімен құттықтады

«Жолаушылар тасымалы» АҚ қарасты «Оңтүстік» аймақтық филиалы Ұлы Жеңістің 74 жылдығына орай арнайы мерекелік шара өткізді.

Филиалда Ұлы Отан соғысына қатысқан үш ардагер тіркелген. Сонымен қатар 9 ауған соғысының ардагері мен Чернобыль АЭС апатын жоюға қатысқан 2 азамат жұмыс істейді. 7 мамыр – Отан қорғаушылар күні мен 9 мамыр Ұлы Жеңіс күні құрметіне осы арадагерлерді шақырып құрмет көрсеткен «Оңтүстік» аймақтық филиалының ұжымы мерекелік концерт ұйымдастырып, ардагерлерге арнайы сыйлықтар табыс етіп, азық-түлік толтырылған себеттер сыйға тартты.

Филиал басшылығы атынан сөз алған Мұрат Сәрсенбин жиылғандарды Жеңіс мерекесімен құттықтап, бейбіт өмір мен ашық аспан тіледі.

«Жолаушылар тасымалы» АҚ «Samruk-Kazyna Trust» Әлеуметтік жобаларды дамыту қорымен бірлесе отырып, жылдағы дәстүр бойынша Ұлы Отан соғысының ардагерлері мен тыл еңбеккерлеріне теміржол көлігінің қызметтерін тегін пайдалануға мүмкіндік беретін арнайы акцияны іске қосқанын айта кетейік.

«Жеңіс» республикалық әлеуметтік-қайырымдылық жобасы аясында өтетін акция шарттарына сәйкес ҰОС ардагерлері мен тыл еңбеккерлері «Жолаушылар тасымалы» АҚ жүзеге асыратын барлық бағыттар бойынша тегін жол жүру құқығына ие.

«Жеңіс» – Ұлы отан соғысы мен тыл ардагерлеріне жыл бойына қолдау көрсетуге бағытталған республикалық әлеуметтік-қайырымдылық жоба. Жобаның басты мақсаты – ардагерлерге деген қамқорлық. Оларға деген жан-жақты көмек пен қолдау. Жоба аясына еріктілер рейді өткізіп, жас буынның тарихқа деген құрметті арттыру жолындағы іс-шаралар жүзеге асырылады.