Америкалық дипломат «Нұрлы жол» теміржол вокзалымен танысты
![](https://rail-news.kz/uploads/posts/2019/5/17/1558096171971.jpg)
«Жақсыны көрмек үшін» демекші, АҚШ-тың Қазақстандағы елшісі Уильям Мозер «Нұрлы жол» теміржол вокзалы кешеніне барды. Тағайындалғанына бірнеше ай болған елшіні елорданың айшықты теміржол кешенін көру идеясы қызықтырған көрінеді.
«Нұрлы жол» вокзал кешенінің бастығы Дінмұхамед Құсайынов қадірлі мейманды сый-құрметімен күтіп алып, америкалық дипломатқа вокзал кешенін таныстырып, заманауи нысан жұмысының технологиялық процесі туралы, персоналдың функционалдық міндеттері жайлы жан-жақты айтып берді.
Вокзал кешені директорының орынбасары Нұрлан Аманжоловтың айтуынша, АҚШ елшісінің сәулет және құрылыс саласынан хабары мол екен. Ол бұрын Еуразия құрлығындағы құрылыстарға жетекшілік еткен көрінеді. Жаңа елші ағылшын, орыс тілдерімен қоса қазақ тілінде де сөйлеп, вокзал қызметкерлерінің ризашылығына бөленген.
Мәртебелі мейманға күту залы, касса залы, фудкорт аймағы, капсулалық мейманхана және өзге де нысандар көрсетіліп, сервистік қызмет түрлері ұсынылды.
Уильям Мозер «Нұрлы жол» теміржол вокзалы кешені, айтса айтқандай, атына заты сай сәнді де сәулетті ғимарат екеніне көз жеткізіп, көрсетілетін қызмет сапасын жоғары бағалапты және жолаушыларға заманауи қызмет көрсету деңгейінің әлемдік тәжірибені есепке ала жасалғандығын жеткізген.
Вокзал кешеніне саяхатын елші мырза одан әрі жалғастырып, іссапарға пойызбен аттанып кетіпті.
Тағы бір жағымды жаңалық, тәулігіне 35 мың жолаушыға қызмет көрсетуге қауқарлы темір жол вокзалы кешенінде сервистің жаңа түрі пайда болды. Күні кеше жолаушылардың жайлылығы үшін қол жүгі мен багаждарды тасымалдайтын, тәулік бойы 24 сағат жұмыс істейтін арнайы қызмет іске қосылды.