Қаржылық шығындарды төмендетін жобалар еңгізіледі
«Қазақстан теміржолшысы» газетінің тілшісі
«ҚТЖ-Жүк тасымалы» АҚ басшылығының қолдауымен өндірістік емес ысыраптарды қысқарту, қаржылық шығындарды төмендету мақсатында Көкшетау локомотивтік айналым депосында бірқатар проблемалық мәселелер шешімін табуда.
Мәселен, жақын күндері локомотивтердің тежегіш жабдықтарын сынақтан өткізуге арналған стенд пайдалануға беріледі. Ал бұл өз кезегінде машинистердің тежегіш үшін қолданатын крандарын Ерейментау станциясында орналасқан жөндеу депосына бармай-ақ, осы жерде сынақтан өткізуге мүмкіндік бермек.
– Жөндеу цехындағы тағы бір табысты еңбек – ол қос дөңгелектерді жонып егеп, тегістейтін станоктың іске қосылатындығы. Санаулы күнде бұл станок қолданысқа енеді, сол кезде Астана жөндеу депосына және Жаңаесіл станциясындағы «Феникс» кәсіпорнына локомотивтерді жөнелту мәселесі өзектілігін жояды. Осыдан-ақ, Компания шығындарының мейлінше қысқаратынын байқауға болады. Біз мұнымен тоқтап қалмаймыз. Төртінші тоқсанда тоқтың күшін немесе кернеуін реттейтін аспап – реостатты іске қосуды жоспарлап отырмыз. Бұл жұмыстар жөндеу цехының позициясын едәуір нығайта түседі, – дейді Ақмола ЖТ бөлімшесі локомотив шаруашылығы бөлімінің бастығы Мұхтар Балғоженов.
Бүгінде аймақта жөндеу кәсіпорындарының жоқ екенін ескере отырып, Ақмола жүк тасымалы бөлімшесі басшылығына «Altyntau Kokshetau» АҚ басшылығы осы өңірге қарасты локомотивтерге техникалық қызмет көрсету бойынша қызметтер ұсынысымен шыққан екен. Қазір бұл мәселе қаралымда көрінеді, егер келісімге келіп, оң шешімін тапқан жағдайда бұл Компания үшін қосымша кіріс көзі болмақ.
Жалпы, Ақмола жүк тасымалы бөлімшесі ұжымының қаржылық тұрақтылықты жақсартудың өзге де жолдарын қарастырып, ізденіс танытып отырғанын айтар едік. Мысалы, жуырда «ҚТЖ-Жүк тасымалы» АҚ басшылығы Көкшетау станциясына УЗОТ құрылғысын орнату туралы шешім қабылдады. Бұл Көкшетау станциясының өткізу қабілетін жақсартумен қатар пайдалану шығындарын қысқартуға ықпал етері анық.
Өңірде атқарылып жатқан барлық шаруа Ақмола жүк тасымалы бөлімшесі директорының міндетін атқарушы Айнабек Жукашевтің бақылауына алынып, күн сайын тексеріліп отыр.