Бірқатар пойыздарға билет бағасы 10 пайызға өсті
«Қазақстан теміржолшысы» газетінің тілшісі
«Жолаушылар тасымалы» АҚ хабарлауынша, бірқатар пойыздарға билет бағасы биыл 21 қыркүйектен бастап 10 пайызға өсті. Бұл туралы аталған акционерлік қоғамның баспасөз қызметі мәлімдеді.
ҚР Индустрия және инфрақұрылымдық даму министрлігі Көлік комитетінің 2019 жылғы 9 қыркүйектегі №28-28-9/2920 хаты негізінде 2019 жылғы 21 қыркүйектен бастап «НұрСұлтан-Сарыағаш», «ҚызылордаСемей», «Атырау-Маңғыстау», «Павлодар-Пресногорьковская», «Алматы-Жезқазған», «АлматыМаңғыстау», «Нұр-Сұлтан-Арқалық» қатынастарындағы пойыздар және «Қарағанды-Сарыағаш», «Алматы-Семей», «Алматы-Достық», «ПавлодарҚызылорда» қатынастарындағы тіркеме/тікелей қатынайтын вагондардан басқа «Жолаушылар тасымалы» АҚ құрастырған әлеуметтік маңызы бар қатынастардағы пойыздар тарифі өсті. Мұның бәрі, әрине, жолаушылар тасымалдайтын пойыздардағы сервис сапасын арттыруға септік етпек.
Атап өтерлік жайт, 2018 жылдың 11 қыркүйегінде «Жолаушылар тасымалы» АҚ-на Қазақстан ішіндегі барлық әлеуметтік маңызды бағдарларға бағаны реттеудің қолайлы жүйесі енгізілген болатын. Мұндай 52 негізгі әлеуметтік маңызды бағдар бар.
Бағаны реттеудің қолайлы жүйесі әлемдік тәжірибеде бар, ол әуе және су көліктерінде кеңінен қолданылады. Сол жүйе бойынша 25 пайыздық жеңілдікті кез келген жолаушы ел ішінде билетті 45 күн бұрын сатып алса, пайдалана алады. Жеңілдік мөлшері бос орындар саны мен пойыз жүргенге дейін қанша күн қалғанына байланысты болады. Пойыздың жүретін уақыты жақындаған сайын билет бағасы өсе береді, бірақ тек 25 пайыздан артық көтерілмейді.
Жоғарыда аталған әлеуметтік маңызды бағдарлардан бөлек 14 коммерциялық бағдар бар, оның ішінде 9 Тальго вагондарына құралған пойыздар. ҚР заңына сәйкес коммерциялық бағдар бойынша билет бағасын жеке тасымалдаушының өзі реттейді. Соған байланысты мұндай бағдарлардағы билет құны -35 пайыздан (жеңілдік) + 35 пайызға дейін және одан да көп деңгейде ауысып тұруы мүмкін.
Осындай жағдайларға байланысты ұлттық тасымалдаушы темір жолда іс-сапарлар мен саяхаттарды ертерек жоспарлап, билеттерді жеңілдікпен алуға кеңес береді.