Меруерттің кіндігі пойызда кесілді

Аптаның басы қуанышты хабармен басталды. Дүйсенбі күні, яғни 23 қыркүйекте №91 «Қызылорда – Нұр-Сұлтан-Нұрлы жол» бағыты бойынша жүретін жолаушылар пойызында тағы бір сәби дүниеге келді.

Жалпы, пойызда туылатын бала саны жағынан Қазақстан алдыңғы орында болса, таң қалмаймыз. Жыл сайын бірнеше сәби осынау әлеуметтік көлікте дүниеге келіп, кіндігі кесіліп жатады. Сондықтан Қазақстан темір жолында жолсеріктердің көпшілігі кіндік әке, кіндік шеше атанып үлгерген десек, артық емес. Бұл жолы да жолаушылар пойызы Тараз–Шу теліміне келгенде 6-вагонда келе жатқан Гүлнұр Жолдас есімді жолаушы келіншектің аяқасты толғағы басталады. Мұны білген пойыз бригадасы дереу радиожелі арқылы жолаушылар арасынан дәрігер іздей бастайды. Абырой болғанда жолаушылар арасында Шолпан Ембаева, Дәркен Байқошқарова, Ботагөз Көшербаева сынды сапар шегіп бара жатқан тәжірибелі дәрігерлер бары анықталды. Бірден 6-вагонға келген олар жолсеріктердің көмегімен жүкті әйелді аман-есен босандырып алады. Шу станциясына жеткенде оларды жедел жәрдем көлігі тосып алып, ана мен баланы жақын маңайдағы ауруханаға жеткізеді.

Компания осы тосын жағдайдан қиналмай шығып, нұқсау бойынша әрекет ете білген пойыз бастығы Меруерт Қорабаева мен оның бригадасына және көмек қолын созған жолаушыларға алғыс білдіреді. Дүниеге келген нәрестеге анасы теміржолшының құрметіне пойыз бастығы Меруерттің есімін беріпті.

Айта кетейік, компанияға қарасты барша жолсеріктер үнемі алғашқы медициналық және штаттан тыс жағдай кезінде көмек көрсету оқу-тренингтерінен өтеді. Мамандардың айтуынша, өткен жылы жол үстінде 10 бала дүниеге келген екен. «Ұлттық тасымалдаушы ана мен балаға зор денсаулық тілейді» деп хабарлайды «Жолаушы тасымалы» компаниясының баспасөз қызметі.