Жаңарып-жаңғырған өлке
«Қазақстан темір жолы» ҰК» АҚ Басқарма төрағасы Сауат Мыңбаев Түркістан облысына жұмыс сапары аясында Түркістан және Арыс қалаларының теміржол вокзалдары мен инфрақұрылымдық нысандарын аралап көріп, жұмысымен танысты.
Компания басшысымен бірге оның бірінші орынбасары Қанат Әлмағамбетов, инфрақұрылым жөніндегі басқарушы директор Бауыржан Орынбасаров және аймақтық жүк тасымалы мен магистральдық желі бөлімшелерінің басшылары Е.Ерманов, М.Оңалов, тағы басқа жауапты тұлғалар болды.
Сауат Мыңбаев облыс әкімі Өмірзақ Шүкеевпен Түркістан облысын дамыту жоспарына сай Түркістан-Ташкент жоғары жылдамдықты теміржол желісін тарту жобасын іске асыру мүмкіндігін талқылады. Ежелгі екі көне қала арасында туризмді дамытуға серпін беретін жоба болашақта жүзеге асырылады деген болжам бар.
Орта Азия қақпасы, тоғыз жолдың торабы Арыс ежелден теміржолшылар қаласы атанған. Сауат Мыңбаев Арыста осыдан бірнеше ай бұрын орын алған жарылыс зардаптарын жойып, бүлінген зақымданған инфрақұрылымдық нысандарды қалпына келтіру жұмыстарының нәтижесімен танысты. Жарылыс салдарынан темір жол торабында орналасқан 60-тан астам қызметтіктехникалық ғимараттар, көптеген тұрғын үйлер зақымдалған болатын. Шойын жол нысандарында жүргізілген барлық жөндеу жұмыстары мерзімінде аяқталған. Қысқа уақыт ішінде көне теміржол вокзалы толық қайта жөндеуден өтіп, жаңа кейіпке енген. Қала өміріндегі тарихи да маңызды нысанның күрделі құрылысын «Самұрық-Қазына» ұлттық әл-ауқат қоры» жүргізді.
ҚТЖ басшысы мен облыс әкімі ғасырдан астам тарихы бар көне жәдігерлердің бірі вокзал ғимаратының бастапқы архитектуралық үлгісін сақтай отырып жаңарып-жасарған келбетіне оң баға берді. Өткен ғасыр басында, 1904 жылы салынған вокзалға биыл – 115 жыл. Ескі болса да сүйегі мықты ғимарат өткен ғасырдан жеткен тарихи сәулет ескерткіші болып отыр.