Қылмыстың үлкен-кішісі жоқ
Қыркүйектің 23-27 күндері аралығында Маңғыстау станциясында желілік полиция бөлімінің ұйымдастыруымен ұсақ құқықбұзушылық пен бұзақылыққа қарсы «Мүлдем төзбеушілік» акциясы өтті. Акцияға теміржолшылар да қатысты.
Іс-шара аясында теміржол мекемесінің қызметкерлері желілік ішкі істер бөлімімен бірлесе Емір ауылының тұрғындарына «Қоғамда ұсақ құқық бұзушылықтарға мүлдем төзбеушілік принципін қалыптастыру» тақырыбында түсіндіру жұмыстарын жүргізді. Шара барысында Қазақстан Республикасының 61 әкімшілік құқық бұзушы анықталып, оларға әкімшілік хаттама толтырылды немесе тиісті жазаға тартылды. Мысалы, олар: ҚР ӘҚБтК баптарына сәйкес Ұсақ бұзақылық, Алкогольдік ішімдіктерін ішу немесе қоғамдық орындарда масаң күйде келу, Жекелеген қоғамдық орындарда темекі шегуге тыйым салуды бұзу, Шетелдіктің немесе азаматтығы жоқ адамның ҚР-ның халықтың көшіқоны саласындағы заңнамасын бұзуы, тағы басқа баптар бойынша айыпталды. Сондай-ақ, Маңғыстау станциясындағы ЖПБ қызметкерлері, теміржолшылар мен көлік прокуратурасы мамандары білім ордаларында 4 рет профилактикалық дәріс өткізіп, «Маңғыстау-АтырауМаңғыстау» пойызында жолаушылармен кездесу ұйымдастырды.
− Жалпы қыркүйек айында әртүрлі әкімшілік құқық бұзушылық үшін көліктегі полиция кезекші бөліміне 1794 адам жеткізілді. Өткен жылы бұл көрсеткіш 1668 болған еді. Яғни, 7,55 пайызға өсті деген сөз. Ювеналдық полиция тобы тәртіп бұзған немесе ұсақ бұзақылық жасаған 48 жасөспіріммен профилактикалық әңгіме өткізді. Былтыр осындай уақытта 24 балаға құқық бұзушылықтың алдын алу шаралары жүргізілген еді. 3 жасөспірім кәмелетке толмағандарды бейімдеу орталығына орналастырылды, ал өткен жылы ондай факт тіркелген жоқ. Ағымдағы жылы кәмелетке толмағандардың жалғызжарым беймезгіл уақытта жүргені үшін 15 ата-ана әкімшілік жауапкершілікке тартылса, өткен жылы 18 ата-анаға осындай жаза қолданылған болатын. Қылмыстың үлкен-кішісі жоқ. Сондықтан біз титтей де болсын құқық бұзушылыққа бей-жай қарамау үшін қоғамда «мүлдем төзбеушілік» қағидасын қалыптастыруға тырысуымыз керек, – дейді Маңғыстау станциясы желілік полиция бөлімінің инспекторы Н.Рахметов.
Жалпы, биылғы жылы теміржолшылар мен құқық қорғау мамандарының қатысуымен 67 рет құқықтық сауаттылыққа байланысты түрлі кездесулер ұйымдастырылыпты. Соның нәтижесінде кәмелетке толмағандардың жолаушылар пойыздары терезесінің әйнегін сындыру, СЦБ қондырғыларын бүлдіру немесе темір жол үстіне бөгде заттарды қою сынды бұзақылық деректері азайған.