Білім мен біліктілік үйлесім тапқанда

Үстіміздегі жылдың 13 қарашасында Көкшетау станциясында ағымдағы айдың 4-де жарияланған «Бүйір рамасы» айлығы аясында көкшетаулық вагон қараушылар, техникалық қызмет көрсету пункттері бастықтарының қатысуымен теориялық және практикалық шараларды қамтыған техникалық сабақ өтті.

Техникалық сабақты ұйымдастырушы Бурабай курорты вагон пайдалану депосының бас инженері Ғалымжан Балабатыровтың айтуынша, шараның басты мақсаты – вагондардағы бүйір рамаларда кездесетін анықталуы аса күрделі ақаулықтарды табу, қауіптің алдын алу, профилактика жүргізу екен.

– Жүк вагондарындағы арбашықтардың бүйір рамаларының сынуы бүгінде пойыздар қозғалысына үлкен қауіп төндіретін басты фактор болып отыр. Көп жағдайда бұл фактор жылжымалы құрамның рельстен шығып кетуіне және темір жол мүлкін бүлдіруге әкеледі. Жүк вагондары арбашықтарының бүйір рамаларының көп күш түсетін бөліктерінде көзге көріне бермейтін құйма ақаулықтары анықталуда. Әрине, бұл – зауыттық ақау. Вагон шаруашылығы департаментімен пойыздардың қозғалыс қауіпсіздігіне нұқсан келтіретін жүк вагондарды Қазақстан темір жолының магистральдық темір жол желісіне жіберудің алдын алу мақсатында бірқатар шаралар жүзеге асырылуда, соның бірі «Назар аударыңыз, бүйір рамасы!» айлығы. Бүгін өтіп жатқан техникалық сабақты оқу шебері Иван Козлов өткізді. Ол алдымен вагон қараушыларға, ПТО бастықтарына «ҚТЖ-Жүк тасымалы» АҚ Вагон шаруашылығы департаментінен келген ТУ ГПВ/12253-И хатымен таныстырды. Мұнда ел өңірлеріндегі барлық вагон пайдалану деполарына бірқатар міндеттемелер жүктелген. Соның бірі ағымдық ағытып алу жөндеу пункттерінің базасында ПТО, КПТО-ның ауысымдық вагон қараушыларына, ТОР қызметкерлеріне бүйір рамаларының күрделі ақауларын анықтау бойынша техникалық сабақтар өткізу болатын. Бүгінгі сабақта Иван Викторович қатысушыларға алдымен иненің жасуындай көзге көріне бермейтін ақауларды анықтау жолдарын, тәсілдерін теориялық тұрғыдан түсіндіріп, практикада көбіне ақаулар орын алатын жерлерді іс жүзінде көрсетті, яғни ақаулық болса, балғамен соққанда қандай дыбыс шығатынын немесе визуалды қарағанда қандай жерлерге, не нәрселерге назар аудару керектігін айтып көрсетті, – дейді Ғалымжан Зейноллаұлы.

Сөз реті келгенде атап өтерлігі, жоғарыдағы Вагон шаруашылығы департаментінен келген ТУ ГПВ/12253-И хатында Қазақстандағы магистральдық теміржол желісіне қабылдап алып жатқан вагондардың техникалық жағдайына бақылауды күшейту, әсіресе, арбашықтардың құйма детальдарының жағдайына, соның ішінде олардың комплектациясына сәйкестігіне айрықша назар аудару міндеттелген. Сонымен қатар Пайдалану ережелерінің талаптар үдесінен табылмаған вагондарды қабылдауға және беруге тыйым салынған. Вагон детальдарын бұзбай бақылау жасаудың феррозондтық тәсілі сияқты басқарушылық құжат талаптарына сәйкес жөндеу кәсіпорындарында рессорүсті арқалығындағы бүйір рамаларын дефектоскопиялау бойынша барлық жұмыс кешенінің өткізілуіне бақылауды күшейту талап етілген.