Үстем болды мерейі

 Тәуелсіздік мерекесі аясында маңғыстаулық теміржолшы мемлекеттік наградаға ие болды. ҚТЖ Қозғалыс қауіпсіздігі департаментінің Маңғыстау аймағы бойынша бас ревизоры, «Нұр Отан» партиясының «Маңғыстау темір жолы» бастауыш партия ұйымы төрағасы Болат Дүйсәлиев «Ерен еңбегі үшін» медалін алды.

Жерлесімізге мемлекеттік медальді «Нұр Отан» партиясының Тәуелсіздік мерекесіне орай Нұр-Сұлтан қаласында өткен салтанатты жиын барысында партияның бірінші орынбасары Бауыржан Байбек табыстады.

− Бұл мен үшін үлкен жауапкершілік жүктейді. Аталған марапатқа республика бойынша 49 адам ұсынылып, соның 23-і өтіпті. Соның ішінде Маңғыстау өңірінен осы сенімге ие болғанымды мақтаныш етемін. Сондықтан алдағы уақытта да соған сай жұмыстану, елге еңбек сіңіру қажет. Біздің БПҰ бұл бағытта биыл біраз шаруалардың басы-қасынан табылды. Жыл қорытындысында аймақта II орынды алдық. Өткен жылы Маңғыстаудан I орын, республикадан III орын бұйырған еді. Келер жылға да жоспарларымыз көп, – дейді Болат Дүйсәлиев.

Еске сала кетсек, «Маңғыстау темір жолы» БПҰ ағымдағы жылғы жоспарына сай бірқатар шаралардың ұйытқысына айналды. Түрлі қайырымдылық акциялары, флешмоб, басқосулар, қоғамдық қабылдаулар өткізді. Ішінде бір-екеуіне тоқтала кетсек, «Есірткіге жол жоқ!», «Билетсіз жолаушыға орын жоқ!» акцияларын ұйымдастырып, жолаушылар вагонымен станцияларға барып, үгіт-насихат жүргізді.