Түбек темір жолында теміржолшыларды марапаттады
Түбек темір жолында Тәуелсіздік күні құрметіне орай өткен салтанатты жиынға Маңғыстау жүк тасымалы мен магистральдық желі бөлімшелерінің директорлары, бөлімшелерге қарасты мекемелердің басшылығы мен қызметкерлері, кәсіподақ ұйымдарының төрағалары, сала ардагерлері, тағы басқа теміржолшылар қатысты.
Жүк тасымалы бөлімшесі директоры Нәжімеден Ғұбашов көпшілікке мерекелік тілегін арнап, Тәуелсіздік жылдарында Маңғыстау теміржолының жеткен жетістіктеріне тоқталып, атқарылған ілкімді істерді тілге тиек етті. Онда әрбір теміржолшының еңбегі ерекше екенін атады. Магистральдық желі бөлімшесі директоры Мұхтар Бақтыгереев та әріптесінің сөзін жалғастырып, жүрекжарды тілегін жеткізді. Ардагерлер атынан Маңғыстау ардагерлер кеңесінің төрағасы Амандық Алдабергенов ізгі тілегін арнады. Құттықтаулардың соңы марапаттау рәсіміне ұласып, талай теміржолшы түрлі құрмет, қошеметке бөленді. Атап өтсек, Коркөл бекетінің басшысы Ідіріс Кисманов, Маңғыстау локомотив пайдалану депосының тепловоз машинисі Рысбай Қазыев «Адал еңбегі үшін» төсбелгісін тақты.
Маңғыстау локомотив пайдалану депосының депо кезекшісі Амангелді Қошмағамбетов, Маңғыстау вагон пайдалану депосының жетекші есепшісі Дәметкен Максумова, Маңғыстау станциясының «Р» бекетінің кезекшісі Багиза Архабаева, Бейнеу айналым депосының тепловоз машинисі Мұхтар Өтесінов, Бейнеу станциясы техникалық қызмет көрсету пунктінің автотежегіш нұсқаушысы Әлібай Жұмабаев, Маңғыстау локомотив пайдалану депосының тепловоз машинисі Жамболат Жолмағанбетов, шаруашылық секторының қызметтік вагон жолсерігі Галина Шакирова «ҚТЖ» ҰК» АҚ Басқарма төрағасынның, «ҚТЖ – Жүк тасымалы» АҚ Бас директорының құрмет грамоталары мен алғыс хаттарын алды. Құттықадам Исмагулов, Мухамбетқали Көпбаев, Үсен Имашев, Орынбасар Аралбаев, Болған Досжанова, Төлеп Айлеков, Базарқан Аяпбергенов сынды теміржолшылар «Еңбек ардагері» атанды.
Сонымен қатар, салтанатты кеште түбек теміржолына еңбегі сіңген, зейнет жасына жеткен теміржолшыларға сый-құрмет көрсетіліп, құрмет демалысына шығарып салды.