Коронавирустың жүк тасымалға әсері тиеме ме?
«Қазақстан теміржолшысы» газетінің тілшісі
«ҚТЖ-Жүк тасымалы» АҚ бас директоры брифинг соңында БАҚ өкілдерінің сұрақтарына жауап берді. Сұрақтың бірі «Қазір Қытайда етек алып жатқан коронавирустың тасымалға әсері тимейді ме?» деген мағынада болды.
– Бұл жағдайға қатысты жүк тасымалының тоқтап қалғаны байқалмайды. Бұл көбінесе жолаушылар тасымалына қатысты болғандықтан, біз жолау-шыларымыздың қауіпсіздігін қамтамасыз ету жағына көңіл бөлеміз. Осы мақсатта ҚТЖ-да штаб құрылған. Қытай аумағына кіретін біздің екі жолаушылар пойызымыз бар.
Оның бірі Достық арқылы жүреді, онда көрші елге кіріп шығатын бар-жоғы оншақты адам, ал Алтынкөл шекаралық станция арқылы жүретін пойызда жолаушылар саны 36 адам шамасын құрайды.
Сондықтан біз бұл пойыздарды уақытша тоқтата тұруға байланысты Министрлікке шығып жатырмыз. Қандай шешім қабылданары, ол уақыт еншісінде.
Біз бүгінде бірінші кезекте жолаушыларымызды қауіпсіздендірумен қатар біздің қызметкерлеріміздің қауіпсіздігін қамтамасыз ету бағытында бірқатар шаралар қабылдап жатырмыз. Ал жүк жөнелтушілер мен жүк қабылдап алушыларға қатысты ешқандай мәселе жоқ, – деп жауап берді спикер.