Шекаралық бекеттегі шектеу

Елімізде төтенше жағдай жариялануына байланысты мемлекеттік шекаралық түйісу нүктесі болып табылатын Болашақ станциясындағы жұмыс үдерісінде де біршама өзгерістер бар. Атап айтқанда, шекаралық бекетте адамдар қатынасына белгілі шекте шектеу қойылды.

Түркіменстан мен Қазақстан теміржол әкімшіліктері арасындағы келісім бойынша 1 сәуір мен 1 мамыр аралығында жүк тасымалында бір бағытты пойыз алмасулар жүргізілуде. Станция бастығы Мақсат Нұрбековтің айтуынша, бұл қос ел теміржолшыларының коронавируспен күресте қауіпсіздік шараларының бірі ретінде бірлесе қабылданған шешім.

– Бір бағыттағы пойыз алмасу дегеніміз не? Яғни, бұрын Түркіменстан теміржолшылары локомотивпен біздің Болашақ станциясының басына келіп, пойызды тапсырып, бізден пойыздарды алып кері кетіп жүрген болса, қазір екі мемлекет адамдарының арасында байланыс болмас үшін екі жақтың да теміржолшылары бір-біріне келмейді. Тек жүк құрамын алып келген машинист пен оның көмекшісі ғана өте алады. Олар пандемияға қарсы арнайы костюммен, маскамен келеді және оларды қабылдап алуға дәл солай қорғаныш киімдерімен «қаруланған» біздің станцияның бір ғана қызметкері шығып, пойыздың құжаттарын алуға барады. Құжат алмасу осылай жүзеге асырылады, басқа ешбір адам қатынасына жол жоқ, бір-біріне жіберілмейді. Көрші әріптестер өз пойыздарын қалдырады, бізден басқа пойызды алып кетеді, сөйтіп ол пойызды өздерінің станциясына апарып өңдеуден өткізеді. Біз де өзімізде ол жақтан келген пойызға қатысты жұмыстарды жа саймыз. Ал екі жақтың бір-біріне қабылдамайтын вагондары болса келесі пойыздарға қосып жібереміз де, тиісті жеделхаттарды алдырамыз, - дейді станция бастығы.

Қауіпсіздікті көздеген шекаралық бекеттегі шектеу шаралары нәтижесін беріп отыр. Станцияда қауіпті індетпен тіркелгендер жоқ. Ал ішкі жұмыстар бойынша станциялықтар қашықтан емес, штаттық режимде ауысымдық ретпен жұмыс жүргізуде екен. Әрине, карантин жағдайындағы барлық қауіпсіздік шараларын сақтап жұмыстарын жалғастыруда. Мекемеден бөлінген маскалар, антисептиктер, респираторлар, қолғаптар т.т. індеттен қорғайтын заттар жеткілікті. Жұмыс орындары толықтай зарарсыздандырылып отырады.

Сонымен қатар адамдардың басын көп қоспау үшін ауысым алдындағы, ауысым кезегін тапсыратын кездегі мақсатты нұсқаулықтар өткізгенде қызметкерлерді бұрынғыдай көп ұстамайды, 3-4 адамнан артық адамның басы қосылмауы қадағаланады. Техникалық сабақтарды да, телефоннан ватсап чаттар ашу арқылы өткізіп, тапсырмалар беруде. Жеделхаттар да сол чаттарға жіберіледі. Сол арқылы жауаптар алуда. Жыл басынан бері үш айда көрші мемлекеттен Болашақ станциясына 105 пойыз, яғни 4725 вагон жүк келген. Ал кері бағытта оларға 97 пойыз 4392 вагон жүк жөнелтілген. Биыл сәуір айынан бастап карантин жағдайына байланысты Қазақстаннан ұн, бидай, қант, азық-түлік тауарларын экспорттауға шектеу қойылды. Тек Ресейден келетін транзиттік азықтүлік өнімдерінен құралған жүктер өтуде. Тағы бір айта кетерлігі, 27 наурыздан бері Түркіменстан мен Иран арасындағы жол жабылған. Сондықтан Болашақ станциясынан тек көрші Түркіменстанға және Ауғанстанға жүк жөнелтілуде.