Тоқсандағы жұмысты табысты қорытындылап отыр
«Қазақстан теміржолшысы» газетінің тілшісі
Ақмола жүк тасымалы бөлімшесінің ұжымы үстіміздегі жылдың бірінші тоқсанындағы жұмысты табысты қорытындылап отыр.
Биыл қаңтар-ақпан айларында теміржолшыларға жұмыс істеуге метео-жағдай өте қолайсыз болғаны анық. Қалың қар үсті-үстіне жауып, телімдерді басты, қатты жел тұрды, ауа температурасының тәулік бойы құбылуы байланыс желілері мен линияларда, электровоздар пантографтарында мұз қатып қалуына әкелді. Мұның бәрі жұмысты қиындата түсетіні айтпаса да түсінікті. Соған қарамастан бөлімше қызметкерлері өз міндеттерін абыроймен атқарып, вагон және локомотив паркін пайдалануға қатысты барлық сапалық көрсеткіштерді толық орындауға қол жеткізді.
Ақмола ЖТ бөлімшесінің оперативті-басқарушылық бөлімінің бастығы Расул Боратаевтың айтуынша, жүк тасымалы бөлімшесіндегі стратегиялық мәселенің бірі контейнерлік пойыздардың бағдарлық жылдамдығын орындау екен. Бұл тұрғыда биылғы бірінші тоқсанда Қытай – Еуропа – Қытай бағытына ұйымдастырылған контейнерлік пойыздарды өткізудегі оң динамика сақталған. Яғни, KPI жоспарының орындалуы 101,4% құраған. Бөлімше ұжымы осы жылдың алғашқы үш айында қол жеткізген пайдалану көрсеткіштерінің қарқынын бәсеңдетпей, одан әрі жалғастыруды мақсат етіп отыр.
– Бүгінде Ақмола ЖТ бөлімшесі басымдық беріп отырған міндет, әрине, ең алдымен пойыздардың қозғалыс қауіпсіздігі мен өндірістік қауіпсіздікті қамтамасыз ету. Сонымен қатар шығындарды оңтайландырып, еңбек өнімділігін арттыру, сондай-ақ, сапалы көрсеткіштерді жақсартып, ұлттық компания алға қойып отырған контейнерлік пойыздардың бағдарлық жылдамдығын арттыруға қатысты міндетін орындау. Автоматтандырылған басқару жүйесін дамыту шарасы да назардан тыс қалмақ емес. Біз осы мақсат-міндеттерді іске асыруға ұжым болып жұмылудамыз, – деді бөлім бастығы.