Еріктілер қызметіне ел риза

Маусымның 9 күні «Нұрлы жол» теміржол вокзалында «СамұрықҚазына» компаниялар тобының еріктілері ауыр және габаритті жүгі бар жолаушыларға көмек көрсету акциясын үшінші рет өткізді.

Бұл жолы көліктегі полиция және теміржолшылардан құралған еріктілер тобы зейнеткерлерге, мүмкіндігі шектеулі жандарға, балалы және жүкті әйелдерге, өзге де көмек қажет еткен жолаушыларға қол жүктерін перронға дейін жеткізіп, кейбір жолаушыларды вагондарына дейін кіргізіп беріп жатты.

– №354 «Нұр-Сұлтан – Семей» бағытындағы жолаушылар пойызына отырмақшы болып вокзалға келгенмін, Өздерін «еріктілерміз» деп таныстырған жас жігіттер кіреберісте-ақ күтіп алып, қолымдағы багажымды алып, өзімді жетектеп тура перронға шығарып, вагонның алдына дейін алып келіп, отырғызып жіберді. Бұл көмек маған өте қажет еді. Аяғымды күйдіріп алып, зорға басып жүргенімде мына балалардың қолұшын беруі тіпті жақсы болды. Оның үстіне мынау атшаптырым зәулім вокзал ғимаратының ішінде жол таба алмай адасып кетуім мүмкін еді. Ерікті жастарға алғыстан басқа айтарым жоқ, – деп ризашылығын білдірді Орынтай Сұлтанайқызы есімді жолаушы апай.

Жолаушыларға көмек көрсету акциясының ұйымдастырылуына ұйытқы болған «Самұрық-Қазына» қорына қарасты Әлеуметтік өзара ықпалдастық және коммуникация орталығының бас директоры Елдос Өмірзақовтың айтуынша, Мемлекет басшысының жарлығымен 2020 жыл – Еріктілер жылы деп жарияланған сәттен бастап әл-ауқат қорына қарасты компаниялар тобынан шыққан еріктілер әртүрлі акциялар жариялап, көп жұмыстар атқарып жатыр. Соның бірі «ҚТЖ» ҰК» АҚ компаниясы да 2020 қайырымды іс жобасын еріктілердің қатысуымен ел өңірлерінде жүзеге асырып жатқанын айтар едік.

– Жолаушыларға қолұшын беру акциясы жолаушылар пойыздары іске қосылған 1 маусымнан бастап үшінші рет өткізіліп отыр. Оған сапарға шыққан адамдарды шығарып салушыларды қазіргі карантиндік жағдайға байланысты вокзалға өткізбеу себеп болды. Біз осы мәселеге байланысты дереу шешім қабылдап, іске кірісіп кеттік. Теміржол саласы басшылығының, Көліктегі полиция қызметкерлерінің келісімін алдық. Міне, жастарымыз өздерінің түскі үзілістерін және жұмыстан кейінгі кешкі уақыттарын игі іске арнап отыр. Бүгінгі акцияға 20 шақты ерікті жас қатысты. Олардың бәрі коронавирус індетіне тест тапсырған. Медициналық маскалармен, қолғаптармен қамтамасыз етіліп, қауіпсіздік шараларын сақтап отыр. Жолаушылар еріктілердің қайырымды ісіне дән риза, – деді Қор өкілі.

Еске сала кетсек, Көліктегі Бас мемлекеттік санитарлық дәрігердің 2020 жылғы 9 маусымдағы қаулысымен 10 маусымнан бастап теміржол вокзалдарының ғимараттарына шығарып салушы азаматтарды жібермеу жөніндегі талап өз күшін жойды. Яғни, жолаушыларды шығарып салушылар енді вокзалға емін-еркін кіріп, қол жүктерін перронға дейін жеткізіп сала алады. Әрине, маска киіп, басқа да қауіпсіздік талаптарын сақтау міндетті.