«Абайлаңыз – маневр!» айлығы өткізілуде

«ҚТЖ-Жүк тасымалы» АҚ-ның тасымал үдерісін ұйымдастыру бойынша жеделхаттық бұйрығына сәйкес республика көлемінде осы жылдың 1 маусымы мен 1 шілдесі аралығында «Абайлаңыз – маневр!» айлығы өткізілуде. Еліміздегі барлық Жүк тасымалы бөлімшелерінде басталған айлық Маңғыстау түбегінде де жалғасын тапты. 

Шара жоспарына сәйкес құрылған комиссия құрамына филиал директорының орынбасары Ерлан Бүркітов бастаған бөлімшенің өзге де басшылық қызметіндегі өкілдері – бас инженер, ревизорлар, локомотив пайдалану депосы басшылығы, станция бастықтары кірді.

– Айлық барысында қызметтік сөйлесу регистраторын тексеру кестесін жасадық. Мен осы айдың төртінде Шетпеге барсам, 16-сы Жетібай станциясын және соған қосып Маңғыстау станциясын тексердім. Тексеру барысында өзім ойлап тапқан «Пойыздар қозғалысы қауіпсіздігін бұзудың алдын алу бойынша сценарлы-эпизодтық әдісті» қолдандым, – дейді Маңғыстау ЖТ бөлімшесі директорының орынбасары Ерлан Бүркітов.

Айлықты өткізу жоспарына сәйкес аймақ теміржолшылары шараның өтетіндігі туралы хабардар етіліп, барлық жерге аншлагтар ілінді. Станция және локомотив депосымен бірге пойыз диспетчері мен маневрлік және пойыздық локомотивтер машинистері арасындағы қызметтік сөйлесу тәртібі түсіндірілді. Сонымен қатар пойыз қозғалысына қатысы бар барлық теміржолшыларға нұсқаулық өткізілді. Маневрлік жұмыстар жүргізілетін станцияларда жоспардан тыс тексерулер өткізіліп, маневрлік жұмыстар сапасы мен қызметтік сөйлесу тәртібі тыңдалды.

Станция кезекшілері, локомотив бригадалары, пойыз құрастырушыларға бірінші техникалық сабақ өткізуге әрбір басшының жеке қатысуын қамтамасыз ету жайы бақыланды. Айлық барысында анықталған кемшіліктердің бәріне акт толтырылып, тиісті теміржол мекемелеріне жолданды. Бір айлықтың әрбір онкүндігі бойынша бөлек-бөлек талдау жүргізіліп отырды. Әр онкүндік нәтижелері айлыққа қатысы бар құрылымдық темір жол мекемелері қатысатын жоспарлы отырыстарда жария етілді.

– Тексеру барлық станцияларда жүргізілуде. Қазіргі таңға әзірге 3 станцияны қамтыдық. Локомотивтегі бригадамен бірге тексеруге шыға отырып техникалық ақауларды анықтадық. Соның нәтижесінде 1 локомотив пайдаланудан алып тасталды. Соған қоса станция кезекшілері мен локомотив бригадалары және пойыз құрастырушылар жұмысында да олқылықтарды көрдік. Олардың қателіктері станцияда пойызды жөнелту, маневрлік жұмыстар жүргізу және жылжымалы құрамды бекіту барысында жіберілді. Мұндай кемшіліктер жоспардан тыс тексеру кезінде де, сөйлесу регистраторын тыңдаған кезде де анықталды, – дейді Е.Бүркітов.