«Пойыздар қозғалысын басқару орталығы»: соңғы көш
«Қазақстан теміржолшысы» газетінің тілшісі
«Қазақстан темір жолы» ҰК» АҚ магистральдық желінің Батыс өңірінде басталған пилоттық жобасы толықтай іске қосылды. Өткен аптада Қызылорда өңірінен келген соңғы көш те осы аптада жұмысқа қосылды.
Басшылық құрам диспетчерлер легінің соңғы көшін қарсы алып, жаңа жұмыс орындармен таныстырды. «Пойыздар қозғалысын басқару орталығы» басшысының орынбасары Мағауия Оразқұлов орталық ішін аралатып, жаңа жұмыс орындарын көрсетті.
Пойыздардың жақындауы, бағыттамалы бұрмалардың, бағдаршамдардың көрсеткіштері туралы ақпарат алу және беру процесінің қалай автоматтандырылатынын түсіндірді. Жоба транзиттік бағыттағы барлық жылдамдықты арттыруға мүмкіндік беретінін айтты.
«Орталық – 250 адам жұмыс жасайтын үлкен мекеме. Пилоттық жобаны іске қосу үшін бір жылға жуық дайындық жұмыстары жүрді. Компания басшылығы тарапынан қоныс аударған қызметкерлердің тұрмыс жағдайына ерекше назар аударылып отыр. Тиісінше барлық жәрдемақы уәде етілгендей төленіп жатыр.
Барлық көмек көрсетіледі. Жұмыстарың алға баса берсін», – деді Ақтөбе жүк тасымалы бөлімі басшысының орынбасары Еділ Шаимов.
Жағымды жаңалық та хабарланды. Осыған дейін Ақтөбеге кешіп келген диспетчерлерге пәтер жалдау үшін 25 АЕК көмек көрсетілетіндігі айтылса, қазір бұл төлем 45 АЕК-ке жетті. Қоныс аударған диспетчерлердің барлығына 125 010 теңге көлеміндегі көмек көрсетіледі.
Және пәтерақы екі жыл бойына төленеді.
«Бірінші күн жұмыс жасап жатқан жоқсыздар, бәріңіз жұмысты білесіздер. Балаларды мектепке, балабақшаға орналастыру, медициналық анықтама алу секілді мәселелерде қиындық болмайды», – деді магистральдық желінің Ақтөбе филиалы директорының орынбасары Болат Аюпов.
Төрт қабатты ғимаратты аралап көрген қызылордалық диспетчерлер орталықтың толық пайдалануға дайын екенін көздерімен көрді. Орналасып болысымен жұмысқа қосылуға дайын екендерін жеткізді.