Нұр-Сұлтаннан Қарағандыға жүріп бара жатқан пойыз адам басып кетті
«Қазақстан теміржолшысы» газетінің тілшісі
Нұр-Сұлтан станциясында өткен 10 ай ішінде жолға бөгде адамның шығуы бойынша 1 жағдай болды. Биылғы 13 тамыз күні сағат 01.17-де №2830 пойыз Қарағандыға жүріп бара жатқанда адам басу оқиғасы тіркелді.
Ішімдік ішкен адам рельс бойында жатқан, пойыз машинисі оқыс тежеу беріп, жолдағы адам басынан жарақат алып, ауруханаға жеткізіледі. Азаматтардың темір жол бойына шығып кетуінің алдын алуға бағытталған профилактикалық жұмыстар карантин кезінде де жүргізілуде. Жыл басынан бері локомотив депосы, желілік тәртіп сақшылары, әскерилендірілген күзетпен бірге 213 адамды қамтыған 14 рейд жүргізілді.
Темір жолға жақын №49, 21, 25, 26 мектептері мен колледждер бойынша 394 адамды қамтыған әңгімелесулер болды. «Темір жол – қауіпті аймақ» тақырыбында бейнероликтер жасалып, таратылды.
Маневр жұмыстары өндірісі мен келген-кеткен пойыздар туралы станцияда адамдарды дер кезінде құлақтандыру тәртібін қамтамасыз ету, станция аумағында, жолаушылар платформалары мен перрондарында қауіпсіздікті қатаң сақтау ережелері жазылған плакаттар мен аншлагтарды жаңарту жұмыстары тұрақты жүргізіледі.
– Айына 1 рет өткізілетін «Станция бастығы күні» кезінде ПЧ, ШЧ, ЭЧ, ЖП басшыларымен бірге ұйымдастырылған жұмыстардың қорытындысы шығарылады. Елорданың Сарыарқа ауданы бойынша жиындарға қатысып, теміржолға қатысты өткір мәселелерді талқылауға атсалысамыз, – дейді станция бастығы Е.Рахымжанов.
Станцияда бөгде адамдар мен пойыз қозғалысы қауіпсіздігіне қатер төндіретін бірнеше қауіпті телім бар.
Қала темір жол арқылы екіге бөлініп жатыр. Мәселен, станцияның тақ паркі арқылы К.Кемеңгерұлы көшесі жағынан вокзалға қарай, станцияның сұрыптау паркі арқылы Ақжол көшесі жақтан вокзалға қарай, сондай-ақ дөңесалды парк арқылы Өндіріс тұрғын алабы жақтан Республика даңғылына қарай және 804-805-шақырымдардағы өткелдер арқылы өтетін адамдар ағыны көп.
Сондықтан жолға бөгде адамдардың өту мәселесі әлі сол күйі өткір қалып отыр. Станция басшылары бұл жағдайды реттеу үшін станция аумағын периметрі бойынша қоршау, станцияның анағұрлым қауіпті деген аймақтарында күзетті арттыру қажеттігін айтады.