2025 жылға қарай жолаушыларға арналған 295 жаңа вагон пайдалануға беріледі
«Қазақстан теміржолшысы» газетінің тілшісі
Болашақта Қазақстандағы жолаушылар пойыздарында дизельді генератормен электр энергиясы өндірілетін және сол арқылы жылытылатын заманауи вагондар болады деп жоспарлануда. Бұл туралы ҚР Индустрия және инфрақұрылымдық даму министрлігі Теміржол көлігі және жолаушылар тасымалы басқармасының басшысы Елдос Нестай мәлімдеді.
– 2025 жылға дейін 295 жаңа вагон сатып алуды жоспарлап отырмыз. Негізгі бағыттар Алматы- Маңғыстау, Алматы-Атырау, Нұр-Сұлтан-Арқалық, Нұр-Сұлтан-Сарыағаш, Нұр-Сұлтан-Маңғыстау бағыттары бойынша болады. Біз сұраныс пен тозу көрсеткіші жоғары бағыттарды зерттейміз. Вагондар отандық «Тұлпар» зауытында сатып алынады. Жаңа стратегиялық серіктестікті анықтау бойынша жұмыс жүріп жатыр. Бұл дизельді генератор арқылы өндірілетін электрмен жылытылатын заманауи вагондар болады деп жоспарлануда. Яғни, экологияға жағымды әсер етеді. Пойызда көмір жағу жолаушыларға да белгілі бір қолайсыздықтар туғызатынын түсініп отырмыз, – дейді ол.
Оның айтуынша, Қазақстанда жыл сайын 100-ге жуық вагон сатып алынады. Қазір қолданыста 2600 жолаушы вагоны бар. Былтыр 100 вагон, 2019 жылы 109 вагон сатып алынса, биыл 94 вагон сатып алу жоспарлануда. Бір вагонның құны шамамен 450 млн теңгеге жетеді. Сондықтан министрлік тасымалдаушы- ларға мемлекеттік қолдау көрсетеді. Бұл, ең алдымен, төмен пайыздық мөлшерлемемен жеңілдетілген несие беру. Осының есебінен тасымалдаушылар вагондарды жаңартады.
«Жалпы, елімізде вагондар- дың тозуы шамамен 46%. Халықтың вагондардың ескіргені туралы наразылығы әділетті. Сондықтан бұл мәселе тұрақты бақылауда. Сонымен қатар, жаңа вагон сатып алу барысында біз мүмкіндігі шектеулі жандардың жағдайын ескереміз», – дейді Е.Нестай Жаңа вагондарда мүмкіндігі шектеулі жолаушы- ларға арналған купе мен арнайы көтергіштің болуы талап етіледі.