40 жылдық еңбек өтілі бар екі қызметкерді зейнетке шығарып салды

«ҚТЖ-Жүк тасымалы» ЖШС ұжымы Құрметті теміржолшы, өндірістік-техникалық департамент менеджері Марат Кеңпейілов пен Ақмола ЖТ бөлімшесі зертхана бастығының орынбасары Шахизада Даукенованы құрметті демалысқа шығарып салды. Бұл кісілер жалпы теміржол саласында 40 жылдан астам, соның ішінде 20 жыл бойы осы ұжымда тапжылмай жұмыс істеген. Әріптестері екі қызметкерді де өз ісіне жауапты, жұмыстарында тиянақты, білікті мамандар деп бағалайды. Серіктестіктің бас директорының орынбасары Қанат Көбесов компания ұжымы мен басшылығы атынан ардагерлерге теміржолдағы көп жылғы ерен еңбектері үшін алғыс білдірді. Марат Кеңпейілов еңбек жолын Гурьев локомотив депосының инженер-механигі болып бастаған. Кәсіпорын құрылған сәттен бастап «Локомотив» АҚ бас маманы, өндірістік-техникалық бөлім бастығының орынбасары болып жұмыс істепті. Ал «ҚТЖ – Жүк тасымалы» ЖШС-да 2016 жылдан бері өндірістік-техникалық департаментте жұмыс істеп келеді. 2018 жылы «Құрметті теміржолшы» белгісімен марапатталған. Ал Шахизада Абайқызы еңбек жолын Ақтөбе-Тауарлы станциясының бағыттамалық қосынында кезекші болып бастап, әр жылдары жүктерді қабылдап-жөнелтуші, станция бойынша кезекші болып еңбек еткен. Кейін Ақтөбе жол бөлімшесі жүк және коммерциялық жұмыс қызметінде техникалық кеңсе операторы, тасымалдау бөлімінің инспекторы, инженер-технолог қызметтерін атқарған. Арқа өңіріне қоныс аударғаннан бері Ақмола бөлімшесі зертханасының жетекші инженері болып жұмыс істеп, зертхана бастығының орынбасары лауазымына дейін көтерілген. Ұжымдастары екі зейнеткердің еңбек жолы, кәсіби және адами қасиеттері жас буынға үлгі болатынын атап өтті.