2021 жылдың миллионыншы жолаушысына «Нұрлы жол» вокзалында тосынсый жасалды

«Нұрлы жол» темір жол вокзалы кешенінде №67 «Өскемен – Нұр-Сұлтан-Нұрлы жол» бағытындағы Тальго пойызынан 2021 жылдың миллионыншы жолаушысы келіп түсті. Ол жеті-сегіз шамасындағы бүлдіршін қыз Виктория Кран екен, деп хабарлайды Rail-news.kz. Виктория анасы Наталья Кранмен бас шаһарға бет алған Тальго пойызына Павлодар қаласынан түнгі сағат 3 шамасында отырыпты. Таңғы сағат 10-ға таяу «Нұрлы жол» теміржол вокзалына келіп тоқтаған пойыздың 4-ші вагонынан түскен миллионыншы жолаушыға «Жолаушылар тасымалы» АҚ серіктесі «Казтехнолоджи» компаниясымен бірге соңғы буын «IPAD» гаджетін, сымсыз құлаққап, тәтті шоколадтар салынып, әдемі безендірілген себет және керемет екі – бірі үлкен, екіншісі кішігірім гүл шоқтарын сыйлады. Миллионыншы жолаушының анасы Наталья Кран бұл тосынсыйға таңырқағаннан аузына сөз түспей тұрғанын айтып, «Жолаушылар тасымалы» АҚ өкілдеріне шексіз алғысын білдірді. Ал Виктория болса, пойызбен жүрген ұнағанын, енді ұшақпен ұшқысы келетінін жеткізді.

«Жолаушылар тасымалы» АҚ «Kaztechnology» ЖШС-мен ұзақ мерзімді келісімшартқа отырған. Серіктес компания Тальго пойыздарында мультимедиялық портал қызметін көрсетеді. Біз жаңағы ұзақ мерзімді келісімшарт шеңберінде жыл сайын еліміздің өңірлеріне 15 бағыт бойынша қатынайтын Тальго пойыздарының жолаушылары арасынан миллионыншы жолаушыны анықтап, оларға сыйлық тартуды дәстүрге айналдырдық. Биылғы миллионыншы жолаушы Өскемен – Нұр-Сұлтан жолаушылар пойызына Павлодар қаласынан билет сатып алған Виктория есімді кішкентай қыз болып шықты. Әрине, анасы сатып алса керек, анасымен бірге түсті пойыздан. Мұндай акциялар Тальго пойыздарының жолаушыларының арасында ғана жүргізіледі және ол адамдарға мотивация береді деген ойдамыз», – дейді «Жолаушылар тасымалы» АҚ «Экспресс» филиалының Сервистік қызмет көрсету бөлімінің бастығы Сұлтан Сырлыбаев.