Ақтөбеде дала өртінен жолаушылар пойызы тоқтатылды

Ақтөбе облысында дала өрті теміржолға қауіп төндірді. Оқиға 2 қыркүйек күні 17:35 шамасында Әйтеке би ауданына қарасты Үйтас станциясы аумағында тіркелді. Теміржолға төнген қауіп салдарынан жолаушылар пойызы тоқтатылды.

Құрғақ шөп тез жанып және қатты желдің әсерінен ол лезде теміржолға жеткен. Ағаш шпалдар жанып, жолдың келесі бетіне өтіп үлгерген.  

«Өрт теміржол бойының 1046-1053 шақырымында, Никельтау және Әйтеке би станцияларының аумағында болды. Үйтас – Құдықсай аралығында далалық өрт теміржолға кірді. Сол күні жел жылдамдығы жоғары, ауа райы да ыстық болды. Шпалдарға әр жерден от тиді. Теміржолға қауіп байқалған сәттен бастап бірден Әйтеке би өрт сөндіру пойызы іске қосылды», – деп хабарлайды Ақтөбе мемлекеттік емес өртке қарсы қызметінің бастығы Әділ Құбаев.  

Теміржолға далалық өрт қауіп төндірмес үшін жолдың екі жағы да ені 4 метр болатындай етіп жыртылған. Бірақ желдің қатты болуынан өртті ауыздықтау оңайға түспеді.  

Сондықтан сағат 17:20-да «Нұр-Сұлтан-Орал» бағытындағы №58 жолаушылар пойызы тоқтатылды. Пойыз жолаушыларын тамақтандыру ұйымдастырылды. Сағат 21:00-де қозғалыс толығымен қалпына келтіріліп, пойыз сапарын әрі қарай жалғастырды. Қазір пойыздардың қозғалысы штаттық режимде.  

Әйтеке би өрт сөндіру пойызы екі күн оқиға орнында болып, жұмыс жасады. Жол бойындағы әр жерден жанған шпалдар толаскездер кезінде қалпына келтірілді.  

Далалық өрт кезінде адамдар зардап шеккен жоқ. Өрттің жалпы ауданы 500 га құраған. Өрт сөндірушілер табиғи өрттің туындауына, олардың таралуына және елді мекендерге жақындауына жол бермеу үшін өрт қауіпсіздігін есте сақтау қажеттігін ескертеді. Қостанай облысында өрт қауіпсіздігі сейілмегендіктен қазір Никельтау станциясы басында Қандыағаш өрт сөндіру пойызы кез келген жағдайға дайын тұр.